काठमाडौं ।

सम्बन्धमा साना–साना झगडा 
भइहाल्छ माया !
साथै नछोडी जाउन...

टिकटकमा पछिल्ला केही दिनयता धेरै रुचाएको गीतको हरफ हो यो । टिकटकको ‘ट्रेन्डिङ’मा समेत परेको यो गीतको शीर्षक हो, ‘नरिसाउन माया’ ।

अल्बाट्रोस नामक टिकटक पेजमा पोस्ट गरिएको यो गीतमा हालसम्म सोही पेजबाट मात्र २५.५ के अर्थात् २५ हजार ५०० भन्दा बढीले भिडियो बनाइसकेका छन् । पहिलो हरफमा मात्र सो संख्यामा भिडियो बनाइएको हो ।

माया कति राम्री भा’को 
आँखाहरू छ लोभलाग्दो 
सधैँ मेरो मन चोरी हिँड्छौ...
...
नरिसाउन माया 
फर्की हेरिदेऊ
आउ न अँगालोमा बेरिदेऊ
म तिम्रो, तिमी मेरै हो...

यीलगायत यो गीतका हरेक हरफमा थुप्रै टिकटक भिडियोहरू बनाइएको छ । गीतमा प्रेमीले आफ्नी रिसाएकी प्रेमिकालाई फकाउनका लागि उनको सुन्दरताको वर्णन गरेका छन् ।

आफ्नै भावना
यो गीतका रचनाकार काठमाडौंको सिनामंगलस्थित ब्रिज वाटर इन्टरनेसनल कलेजमा कक्षा–१२ मा अध्ययनरत लिसन खड्का हुन् ।

स्टुडियोमा नै गएर आफ्नै एउटा गीत रेकर्डिङ गर्ने लिसनको सपना थियो । एक दिन लिसनसँग उनकी एकजना साथी रिसाइन् । शब्द बुन्नमा माहिर उनले म्यासेज बक्समा नै तारिफका पुल बाँध्दै साथीलाई पठाए । रेकर्डिङका लागि गीतको खोजी गरिरहेका लिसनले पछि म्यासेजमा पठाएका आफ्नै भावनालाई गीतमा बदली दिए ।

०००

लिसनले कक्षा–८ मा हुँदादेखि गीत लेख्न थालेका थिए । लेख्ने मात्र होइन, उनी मोबाइलमा नै रेकर्ड गरेर आफ्नै यट्युब च्यानल लिसन खड्कामा अपलोड पनि गर्थे, तर भ्वाइस चेन्ज गरेर ।

“आफ्नै भ्वाइस मन पर्दैन थियो । लाज पनि लाग्थ्यो । त्यसैले भ्वाइस चेन्ज गरेर हाल्थेँ । नौ क्लाससम्मै त्यसैगरी गीत अपलोड गर्थेँ । तर, १० मा हुँदा एकचोटि आँट गरेर जस्तो भए पनि हाल्छु भनेर आफ्नै भ्वाइसमा हालेँ । तर, मोबाइलमा रेकर्ड गरेको भएर अडियो क्वालिटी नराम्रो आयो,” लिसन सुनाउँछन्, “त्यसपछि त्यो भिडियो मैले युट्युबबाटै डिलिट गरिदिएँ । त्यसपछि भने एकचोटि भए पनि स्टुडियोमा नै गएर गाउँछु भनेर सोचेँ ।”

तर, यो क्षेत्रमा उनले चिन्ने कोही थिइनन् । अन्योलमा परे । केही समयपछि एकजना दाइको चिनजानमा उनी पिक स्टुडियो पुगे । स्टुडियोको अनुभव नभएका लिसनले एक्सपेरिमेन्टको ‘भावना’ शीर्षकको गीतमा कभर गाए । र, आफ्नै युट्युबमा अपलोड गरे । यसका लागि उनले गीतका सर्जकसँग ट्रयाक मागे र कभरका लागि अनुमति पनि पाए ।

पहिलो गीतबाट उनले नसोचेको प्रतिक्रिया पाए । पहुँच थोरैमा पुग्यो । तर, जतिले हेरे, जतिमा उनको गीत पुग्यो, सबैले प्रशंसा गरे । पहिलो गीतबाट पाएको प्रशंसाले लिसन थप हौसिए । अब आफ्नै गीत गाउनुपर्छ भन्दै लेख्न थाले । तर, उनलाई त्यति चित्त बुझिरहेको थिएन ।

अन्ततः म्यासेजमा पठाएका उनका भावना नै गीतमा परिणत भयो, “मैले म्यासेजमा जे–जे लेखेर पठाएको थिएँ, त्यसैलाई राइमिङ मिलाएर गीत बनाएको हो । सुरुमा त मैले त्यो लास्टमा गाएको नरिसाउन माया गाएँ र त्यसलाई इन्स्टा (इन्स्टाग्राम) मा हालेँ । अनि, सबैले गीत बनाऊ भनेर भनेपछि त्यसलाई गीत बनाएको हो ।”

उनले यो गीत सात महिनाअघि नै लेखेका थिए । तर, स्टुडियोमा नै गएर रेकर्ड गरेर युट्युबमा अपलोड गरेको भने एक महिना मात्र भयो ।

लिसनले यो गीत आफैँले गितार बजाएर एक ‘टेक’मा नै रेकर्ड गराएका हुन् । “एक घण्टाको एक हजार दिनुपर्ने रहेछ । मैले यो आफैँले गितार बजाएर एकै टेकमा फाइनल रेकर्ड गरेको हो,” उनले सुनाए ।

उनले गीत लेख्ने र गाउनेबारे नजिकका साथीहरूबाहेक उनकै परिवारलाई पनि थाहा थिएन । “मेरो मिल्ने साथीहरूलाई मात्रै थाहा थियो । फ्यामिलीमा कसैलाई थाहा थिएन । भर्खर यो गीत (नरिसाउन माया) आएपछि मात्रै थाहा पाउनुभयो । अहिले ममीबाबाले ‘ठिकै छ, राम्रो गरिस् । अब रेकर्डिङ गराउनुपर्‍यो भनेचाहिँ कति पर्छ भन्नु’ भन्नुभएको छ । खुसी हुनुभएको छ,” उनी भन्छन् ।

यो गीतको लोकप्रियतालाई लिसन ‘लक’का रूपमा लिन्छन् । त्यसैले पहिलो गीत चल्यो भन्दैमा उनी गायक नै हुन्छु भन्ने निर्णयमा पुगिसकेका छैनन् । अब आउने उनका दुई–तीन गीत पनि स्रोता–दर्शकले रुचाइदिए भने गायनबारेमा थप सोच्ने योजना बनाएका छन् ।

यो गीत लिसनले युट्युबमा राख्नेबित्तिकै चर्चा कमाएको होइन । अपलोड गरेको १२–१३ दिनसम्म पनि त्यति भ्युज पाएको थिएन । ३०० जति भ्युज थियो ।

त्यसपछि लिसनले टिकटक अकाउन्ट खोले र पहिलो भिडियोका रूपमा आफ्नै गीत हाले । टिकटकमै थुप्रैलाई आफ्नो गीत ‘प्रोमोट’ गरिदिन आग्रह पनि गरे । तर, धेरैले ठूलो रकम मागेको उनको भनाइ छ ।

त्यसपछि उनले अल्बाट्रोस भन्ने टिकटक पेजलाई आग्रह गरे । त्यहाँ निःशुल्क लिसनको भिडियो पोस्ट गरियो । त्यसको केही दिनमै टिकटकमा ‘रोस्ट’ भिडियोहरू बनाएर चर्चामा आएका कलाकार सजीन श्रेष्ठले पनि कभर बनाएर आफ्नो टिकटकमा अपलोड गरे । त्यसपछि टिकटकमा मात्र नभई युट्युबमा पनि उक्त गीतको भ्युज बढ्न थाल्यो । अहिले उनको गीतमा टिकटक भिडियो, कभर र थुप्रै ‘मिम’ बनिसकेका छन् ।

उनले अहिलेसम्म तीन गीत लेखेका छन् । त्यसमध्ये एउटा अरूकै यु्ट्युबमा अपलोड गराएका थिए । अर्को एउटा गीत फेरि स्टुडियोमा रेकर्ड गरेर आफ्नै युट्युबमा राख्ने सोचिरहेका छन् ।

उनी अहिले यही चर्चित ‘नरिसाउन माया’को भिडियो निकाल्ने तरखरमा छन् । हाल भने यसको लिरिकल भिडियो मात्र छ ।

नितेशजंगको गीत सुनेपछि...
लिसनलाई नेपाली गीतमा रुचि थिएन । चाख दिएर कहिल्यै सुनेका थिएनन् । आठ कक्षामा हुँदा एकपटक विज्ञान विषय पढाउने ‘सर’ले सबैका सामु कक्षामा नै नितेशजंग कुँवरको ‘फ्ल्टी माया’को सुरुको बिट सुनाए । होस्टेलमा बस्ने लिसनलाई त्यो बिटले यति तान्यो कि स्कुलको बिदासम्म उनले दिमागमै राखे । घर आउनेबित्तिकै त्यही गीत सुने । त्यसपछि लिसनले एकपछि अर्को गर्दै नितेशका गीतहरू सुन्न थाले ।

विस्तारै उनले प्रवेश कुमार र आशुतोष केसीका गीतहरू पनि सुने । ती गीतका ‘लिरिक्स’ले तान्यो । नेपाली गीतहरू पनि राम्रो हुनेरहेछ भन्ने लाग्यो । आफूमा पनि राम्रो लिरिक्स लेख्ने हुटहुटी चल्यो ।

लिसनले सुन्ने यी ती गायकहरू हुन्, जो मिडियामा आउँदैनन् र व्यावसायिक रूपमा गायनमै मात्र पनि लागिरहेका छैनन् । उनीहरू आफ्नै य्ट्युबमा लिरिकल भिडियो बनाएर गीतहरू पोस्ट गर्ने गर्छन् । नेपालमा यस्ता थुप्रै गायकहरू छन् ।

सोख
लिसनमा गायक बन्छु भन्ने ठूलो उत्साह छैन । यो सोख मात्र भएको उनी बताउँछन् । “प्यासनभन्दा पनि हबी मात्रै हो । मलाई टुरिस्ट गाइड बन्ने मन छ,” उनी भन्छन् । लिसन अहिले होटेल म्यानेजमेन्ट लिएर पढिरहेका छन् ।

कुनै समय साथीहरूमाझ मात्र चर्चा हुने उनका गीतमा अहिले नचिनेका धेरैले कमेन्ट गर्छन् । “पहिला साथीहरूको मात्रै कमेन्ट आउँथ्यो । विस्तारै अरूको पनि कमेन्ट र म्यासेज आउन थाल्यो । जेसुकै होस् म सबैलाई रिप्लाई गर्छु भन्ने लाग्छ र गरी पनि रहेको थिएँ,” उनी भन्छन्, “तर, यति धेरै अहिले कमेन्ट, म्यासेज आइरहेको छ कि हरेकलाई रिप्लाई गर्छु भन्दा पनि सम्भव नै नहुने रहेछ । तर पनि कोसिस भने गरी नै रहेको छु ।”