काठमाडौं । दरबारमार्गस्थित याक एन्ड यती होटलमा बुधबार साँझ विभिन्न क्षेत्रका हस्तीहरूको ठूलो जमघट थियो । नेपाली सेनाका पूर्व प्रधानसेनापति, सफल व्यवसायी, संगीतकार, रचनाकार तथा गायक/गायिका, कलाकारलगायतको बाक्लो उपस्थिति थियो । यी विभिन्न क्षेत्रका व्यक्तित्वहरूलाई एकैथलोमा जम्काभेट गराउने अवसर पूर्वसैनिक, व्यवसायी तथा पछिल्लो समय नयाँ परिचय पनि अब्बल बनाउने यात्रामा रहेका विकास राणाले जुराएका हुन् । 

राणा सांगीतिक दुनियाँको यात्रामा आफ्नो नयाँ परिचय थप बलियो बनाउने उद्देश्यका साथ लागिसकेका छन् । बुधबार उनको सोही यात्रामा ‘विकास राणाको गीति यात्रा’ सार्वजनिक गरिएको छ । उक्त गीति एल्बममा उनले आवाज भरेका ११ वटा गीतको भिडियो समावेश छन्, जसको बुधबार भव्य कार्यक्रमसहित सार्वजनिक गरियो । 

जागिरे जीवनपछि सफल व्यावसायिक जीवनमा आफ्नो परिचय स्थापना गरेका राणा अब सांगीतिक क्षेत्रमा पनि सफल व्यक्तित्वको परिचय बनाउने होडमा छन् । उनको आवाज भरिएका ११ वटा गीतको भिडियोमा राजेश हमाल, वर्षा राउत, आर्यन सिग्देललगायत कलाकारको अभिनय छ ।

पहिलो दुई गीत सार्वजनिक गर्न मञ्चमा पुगेका पूर्वसेनापति गौरव शम्शेर जबराले भने, “उहाँको जीवन यात्रा नै सफलताले भरिपूर्ण छ । सबै युवापिँढीले अनुकरण गर्नुपर्ने यात्रा उहाँले तय गर्नुभएको छ । उहाँको सफलताको अझै उत्तरोत्तर प्रगतिको कामना छ ।”

‘गीति यात्रा’ सार्वजनिक कार्यक्रममा ११ वटै गीतको भिडियो देखाउनुका साथै गायक राणाले लाइभ ब्यान्डसहित आधा दर्जन गीत गाएका थिए । उनले ११ वटा गीतमा लोक, आधुनिक, गजल, कवालीलगायत धेरै विधा समावेश गरेका छन् । 

“मैले यो गीति एल्बममार्फत् सबै खालका गीत गाउने कोसिस गरेको छु । मेरा लागि यो नितान्त पहिलो प्रस्तुति हो । त्यसैले, म केही उत्साहित पनि छु र केही नर्भस पनि छु,” उनले भने । 

आगामी दिन आफूलाई गीत–संगीतमा समर्पण गर्ने सोच रहेको उनले सुनाए । 

जागिरे जीवनदेखि सफल व्यवसायीसम्म
विकास जंगबहादुर राणा, उड्डयन क्षेत्रमा  सुपरिचित नाम हो । सन् १९५७ मा पोखरामा जन्मिएका उनी १८ वर्षको उमेरमा नेपाली सेनामा प्रवेश गरेका थिए । नौ वर्षपछि सैनिक सेवाबाट पाइलट तथा इन्स्ट्रक्टरको रूपमा काम गरे । यही क्रममा उनी वायुसेवा सञ्चालक संघमा तीनपटक अध्यक्ष पदमा निर्वाचित भए । 

उनले यूएसए, स्कटल्यान्ड, थाइल्यान्ड, फ्रान्सलगायत विभिन्न देशबाट फ्लाइङ कोर्सहरूमा विज्ञता हासिल गरी इन्स्ट्रक्टरको रूपमा कार्य गरिसकेका छन् । राणाले इन्डियन एयरफोर्सबाट पाइलट ट्रेनिङ कोर्समा ग्रयाजुएसन गरेका हुन् ।

तर, जागिरे जीवनले सन्तुष्टि नमिलेपछि आफ्नो विज्ञताअनुसार व्यवसाय  सुरुवात गरे, ‘फिस्टेल हेलिकोप्टर’मार्फत् । यसका साथै उनी फिस्टेल एयर प्रालि, समिट एयर प्रालि, एम्पेरियल अपार्टमेन्ट प्रालिका अध्यक्ष तथा शिखर इन्स्योरेन्सका संस्थापक अध्यक्ष हुन् ।

टेनिस र गल्फमासमेत उत्तिकै रुचि राख्ने राणा आफ्नो सफलताको जस भने ‘टिम वर्क’ लाई दिन्छन् । 

तस्विर : हरिशजंग क्षेत्री