काठमाडौं । ‘ए राता मकै ! होइन हो, ड्राइभर सा’ब कतापट्टि फर्केर हेरि’रा भन्या ? कति पैसा भो ? मिटरमा कति उठ्यो भन्या ?’ एकताकाको एउटा नेपाली टेलिशृंखलाको संवाद हो यो । पूरा संवाद सायद धेरैले बिर्सिसके । तर, थेगो ‘ए राता मकै !’ दर्शकको मनमस्तिष्कमा आज पनि उत्तिकै ताजा छ ।

कलाकार किरण केसी यही थेगोबाट लोकप्रिय भए । ‘दुर्घटनावश’ राखिएको थेगोको ‘ब्याज’ उनी आजसम्म पनि खाइरहेका छन् ।

‘१५ गते’ र ’लालपुर्जा’ले उनलाई नेपाली मनोरञ्जन क्षेत्रमा विशेषगरी हास्य विधामा स्थापित गरेकै थियो, ‘जिरे खुर्सानी’को उक्त थेगोले परिचयमा उपमा थपिदियो । 

शृंखलाको १७औँ तर कलाकार केसीका लागि पहिलो भागको छायांकन चलिरहेको थियो । केसी उक्त घटनामा सम्झिँदै भन्छन्, “सुटिङ गर्ने क्रममा निर्देशकले एक्सन भन्यो, मैले आफ्नो डायलग भनेँ । तर, एउटा सानो बच्चाले क्यामेराको ह्यान्डलमा छोएर क्यामेरा हल्लियो । फेरि गर्नुपर्ने भयो । रिपिट गर्दा जितु नेपालले खुसुक्क आएर ‘ए दाइ, ए राता मकै भन्ने हो कि !’ भन्यो । म पनि भन्न तयार भएँ । अनि, एक्सन भन्नेबित्तिकै सोही थेगोबाट सुरु गरेँ ।”

महजोडीको ‘१५ गते’, ‘लालपुर्जा’ वा ‘जिरे खुर्सानी’ नै किन नहोस्, एकपछि अर्को गर्दै सानो पर्दाका दर्शकलाई पेट मिचिमिची हाँस्न बाध्य बनाएका थिए । चार दशकदेखि उनले आफ्नो ठट्यौली हाउभाउ र संवादबाट हँसाउँदै आएका छन् ।

पछिल्लो समय उनी चलचित्र निर्माणमा पनि होमिएका छन् । उनी कार्यकारी निर्माताका रूपमा जोडिएको मल्टिस्टारर चलचित्र ‘लक्का जवान’ प्रदर्शनको अन्तिम चरणमा छ ।

बलिउड र दक्षिण भारतीय चलचित्रको छायामा नेपाली चलचित्र पर्‍यो भन्ने गुनासो निर्माता तथा निर्देशकहरूको छ । कलाकार किरण भने एकपछि अर्को गर्दै निर्माणमा होमिएका छन् । “चुनौती त हो नै, हामीले बनाएको फिल्म मात्रै देखाउनुपर्छ भनेर हुँदैन । बजारमा गएपछि बजारसँग प्रतिस्पर्धा गर्नैपर्छ । तर, प्रतिस्पर्धा गर्ने भन्दैमा हामीले हाम्रो संस्कृति र कलालाई नेपाली चलचित्रमार्फत देखाउन छोड्नु हुँदैन ।”

विदेशी चलचित्रले ओझेलमा पर्छ भन्दैमा चलचित्रमार्फत आफ्नो पहिचान जोगाउन छोड्न नहुनेमा उनी जोड दिन्छन् । “यसलाई सम्बन्धित निकाय जस्तै : विकास बोर्ड र नेपाल सरकारको सञ्चार र संस्कृति मन्त्रालयबाट परिमार्जित गरेर कोटा सिस्टममा लग्न सक्यौँ भने हाम्रो कला र संस्कृतिको उत्थान हुन्छ । नभए हाम्रो संस्कृति अतिक्रमण मात्रै होइन, न्याक्ने नै खालको अवस्था अहिले सिर्जना भएको छ,” केसीले भने ।

टर्निङ प्वाइन्ट 
कलाकार केसी आफ्नो करियरमा तीनवटा ‘टर्निङ प्वाइन्ट’ भएको बताउँछन् । पहिलो, महजोडीसँग खेलेको लोकप्रिय टेलिशृंखला ‘१५ गते’ । दोस्रो, महजोडीकै ‘लाल पुर्जा’ र तेस्रो, ‘जिरे खुर्सानी’ ।

जिरे खुर्सानीमा किरण केसीले बोलेका संवादहरू एकपछि अर्को गर्दै चर्चित हुँदै गए । फलस्वरूप, उनले विभिन्न विज्ञापनहरूमा खेल्ने मौका पाए । देशकै विभिन्न जिल्लादेखि विदेश सयरसम्मको अफर आयो ।

उनको लोकप्रियता यतिमा मात्रै सीमित छैन । काठमाडौंको इमाडोलका स्थानीय उनको घर जाने चोकको नाम नै ‘राता मकै’ नामांकन गरिएको छ । नेपाल सरकारले ‘राता मकै’ मार्ग भनेर रातो बुकमा लेखिदियो । कक्षा–५ को अंग्रेजी पाठ्यक्रममा ‘राता मकै’ भनेर एउटा विषय नै राखिदियो । एकजना विद्यार्थीले ‘राता मकै’को नाममा थेसिस नै गरेका छन् ।

ख्यालठट्टा र रमाइलो गर्न रुचाउने सानैदेखिको स्वभावका कारण न उनलाई पढाइमा रुचि भयो न त बुवाले भनेजस्तो ‘बिँडो’ नै थाम्न सके । कुनै समय सानो पर्दामा राजाराम पौडेल र किरण केसीको जोडी मज्जाले जमेको थियो । क्यामेरामा मात्रै नभएर पौडेल र केसी रियलमा पनि एकदमै ठट्टामजाक गर्छन् ।

ख्यालठट्टा गर्न र व्यंग्यात्मक रूपमा जस्तालाई त्यस्तै जवाफ फर्काउन सक्ने क्षमता उनमा छ । राजाराम पौडेलको एउटा ठट्टाकै कारण किरण केसीलाई आजभन्दा २५ वर्ष अगाडि पशु अस्पतालसम्म पुर्‍याएको रमाइलो प्रसंग पनि छ ।

ठूलो पर्दामा समेत उनले आफ्नो छाप छोडेका छन् । गीत पनि गाएका छन् । उनै केसीसँग नेपाली चलचित्र, हास्यव्यंग्य, माडीको जग्गा विवाद र राजनीतिमा कलाकारहरूको प्रवेशबारे गरिएको भिडियो संवाद हेर्नोस्–