काठमाडाैं । बलिउड अभिनेता सलमान खान चाँडै नै नेपाल आउने भएका छन् । उनी जेठ १४ मा दशरथ रंगशालामा हुने ‘दबंग टुर रिलोडेड’ का लागि नेपाल आउन लागेका हुन् । 

ओडीसी इन्टटेन्मेन्ट र हिता ग्रुपको संयुक्त आयोजनामा सलमानलगायत बलिउड कलाकारहरु सोनाक्षी सिन्हा, ज्याक्लिन फर्नानडिज, प्रभु देवा, मनिष पल, गुरु रन्धावा, आयुष शर्मालगायत टिम नेपाल आउन लागेको हो । सलमान नेपाल आउने भएसँगै उनको पारिश्रमिक कति होला ? उनी कति दिनका लागि नेपाल आउँदै छन् र के–के गर्दैछन् भन्ने सबैको चासोको विषय बनेको छ । कानुनी झमेलामा फसेकाका कारण ज्याकलिन नेपाल आउने हुन वा होइनन् भन्ने धेरैको आशंका छ । 

आयोजक ओडीसी प्रमुख सिमान्त गुरुङका अनुसार सलमानलाई ३ करोड भारतीय पारिश्रमिकमा नेपाल ल्याउन लागिएको हो । “सलमान खानलाई हामीले भारु ३ करोड पारिश्रमिक दिएका छौं  । अहिलेसम्म सबै कलाकारका लागि जम्मा भारु ६ करोडको अनुमान गरेका छौं ।” ६ करोडमा बाँकी ३ करोड भने अन्य कलाकारहरूको पारिश्रमिक हो । उनका अनुसार सलमान लगायत बलिउड कलाकारहरुलाई पारिश्रमिक पनि पठाइसकेको छ ।

सलमानले समय दिएमा ‘माउण्टेन फ्लाइट’मार्फत सगरमाथा अवलोकन गराउने तयारी पनि आयोजकको छ । “हाम्रो इभेन्ट २८ तारिखमा छ । उहाँको नेपाल बसाई तीन दिन रहनेछ । २७ तारिखमा बिहान नेपाल आउनुहुन्छ । २९ तारिखमा फर्किनुहुन्छ । यदि उहाँ २६ तारिखमा आउनु भयो भने ‘माउण्टेन फ्लाइट को योजना पनि छ । यदि २७ मा मात्रै आउनु भयो भने लुम्बिनी भ्रमण र एकदिन प्रायोजकहरुसँग ‘मिट एन्ड ग्रिट’ को कार्यक्रम छ,” ओडिसी प्रमुख गुरुङले बताए । 
 
सलमान लगायत टिम नेपाल आउँदा सोल्टी होटलमा बस्ने व्यवस्था मिलाइएको छ ।

बुधबार भएको पत्रकार सम्मेललनमा सलमानसँग भिडियोवार्ता गर्दै संस्कृति, पर्यटन तथा नागरिक उड्यनमन्त्री प्रेमबहादुर आलेले पनि माउन्टेन फ्लाइटका लागि सलमानलाई निम्तो दिइसकेका छन् । सलमानको ‘दबंग टुर रिलोडेड’ को निर्देशन, स्क्रिप्ट र व्यवस्थापन उनकै भाइ सोहेल खानको सोहेलखान इन्टरटेन्मेन्टले गरेको छ । 

दशरथ रंगशालामा हुने कार्यक्रमका लागि ब्रोन्ज टिकट ५ हजार, सिल्भर टिकट १० हजार, गोल्ड टिकट १५ हजार र प्लेटिनम टिकट २५ हजार रूपैयाँ तोकिएको छ । जुन चाँडै नै डिजिटल वालेटमार्फत बिक्री खुला गरिने आयोजकले जानकारी दियो ।

सलमान खानलाई सगरमाथाको हवाई सफर गराउने मन्त्री आलेको रहर