काठमाडौं ।  सुनसरीको बर्जु गाउँपालिकामा आयोजित महोत्सवमा मंगलबार भएको आगजनी र तोडफोड घटनाबारे भोजपुरी कलाकार खेसरीलाल यादवले स्पष्टीकरण दिएका छन् । महोत्सवको अन्तिम दिन मंगलबार भोजपुरी कलाकार खेसरीलाल नआएपछि त्यहाँ पुगेका दर्शकले तोडफोड र आगजनी गरेका थिए ।

तोडफोडपछि विराटनगर पुगेका कलाकार खेसरीलाल फेसबुक लाइभमार्फत आफ्नो गल्ती नभएको बताएका छन् ।

“हेर्नुहोस्, यसमा न म दोषी हुँ, न जनता हुन्, न त नेपालको प्रशासन । यसमा दोषी भनेको आयोजक मात्रै हो, जसले प्रशासनबाट कार्यक्रम रद्द गर्न निर्देशन दिइसक्दा पनि मलाई जानकारी गराएन र जनतालाई टिकट बेचिरह्यो,” उनले भनेका छन् ।

आफू नेपालको बोर्डमा विहानको ७ बजेसम्म पुगिसकेको र करिब ११ बजेतिर कार्यक्रम स्थल जान खोज्दा होटलमै प्रहरी प्रशासनले रोकेको कलाकार खेसरीलाल बताउँछन् । 

बिहानदेखि कलाकार खेसरीलालको प्रस्तुति हेर्न कुरेर बसेका दर्शकहरू दिउँसो १ बजेसम्म पनि नआएपछि अक्रोशित बनेका थिए । उनीहरूले भारतीय नम्बर प्लेट भएका चारवटा स्कार्पियो जलाए भने प्रस्तुति दिन आएका कलाकारका टिमलाई कुटपिट पनि गरे । 

यी सबैमा आफ्नो करिब डेढ करोडको नोक्सानी भएको भन्दै उनले यसको क्षतिपूर्ति आयोजक टिमले दिनुपर्ने माग गरे । तर, यस्तो घटना भइसक्दा पनि आयोजक टिमसँग कुनै सम्पर्क नभएको र आफू र आफ्ना नेपाली समर्थकलाई धोका दिएको यादवले आरोप लगाएका छन् । 

आयोजक टिमले कार्यक्रममा टिकटको व्यवस्था भएको समेत नबताएको र नेपालमा कोरोनाका कारण यस्ता सभा, समारोह लगायत कार्यक्रमहरू बन्द गर्न निर्देशन दिएपनि आयोजक टोलीले उनलाई झुक्काएको उनको दाबी छ ।

यति मात्रै नभएर आयोजकले आफ्नो छवि पनि बिगारेको आरोप उनले लगाएका छन् ।