काठमाडौं । कैलालीको टीकापुरमा टीकापुर साहित्य महोत्सवको दोस्रो संस्करण हुने भएको छ । यही फागुन २४ देखि र २६ गतेसम्म तीनदिने ‘टीकापुर साहित्य महोत्सव, २०८१’ हुन लागेको हो ।

यो दोस्रो संस्करणलाई ‘पहलमानसिंह स्वाँर साहित्य विशेष संस्करण’ नाम दिइएको साहित्य महोत्सवका संयोजक एवं साहित्यकार महेशविक्रम शाहले जानकारी दिए ।

महोत्सवमा २१ सत्र हुनेछ । लेखक तथा अध्येता हरि शर्माको विद्वत प्रवचनबाट थालनी हुने महोत्सवमा प्रा. डा. अभि सुवेदीका अभिव्यक्ति रहनेछ ।

महोत्सवमा आख्यानकार नारायण ढकाल, केशव दाहाल, बुद्धिसागर, सरस्वती प्रतीक्षा, प्रगति राई, सगुना शाह, रन्जना निरौला, सुमन वर्षा घिमिरे, प्रभा बराललगायत साहित्यकारले नेपाली आख्यानका विविध विषयमाथि बहस गर्नेछन् । विन्दु सुवेदी, युवराज नयाँघरे, प्रतीक ढकाल, मोहन मैनाली, घनश्याम खड्काले नेपाली गैरआख्यान र जीवन दर्शनका बारेमा विचार–विमर्श गर्नेछन् । 

गैरआख्यानकार तथा समालोचक लक्ष्मणप्रसाद गौतम, ज्ञानु अधिकारी, डा. व्रतराज आचार्यका साथै सुदूरपश्चिम विश्वविद्यालयका पूर्वउपकुलपति डा. अम्मरराज जोशी तथा धनन्जय तिमिल्सिनाले नेपाली साहित्यमाथि आलोचनात्मक विचार प्रस्तुत गर्ने शाहले जानकारी दिए ।

साहित्यका साथै महोत्सवमा वैकल्पिक राजनीति, स्थानीय तहमा महिलाको नेतृत्व, समाज, थारु संस्कृति, विकास, पर्यटन, दलितका मुद्दा, जीवन दर्शन, नेपाली चलचित्र तथा टीकापुरका चुनौती र अवसरलगायत विषयमा बहस गरिनेछ ।