वर्षा महर्जन । रङ्गकर्मी सुनील पोखरेलले गुरुकुललाई सबै प्रधानमन्त्रीले आश्वासन मात्रै दिएको गुनासो गरेका छन् । पटक–पटक प्रधानमन्त्रीहरुले गुरुकुलका लागि सरकारी जग्गा उपलब्ध गराउने बचन दिए पनि पूरा नगरेको उनको भनाइ छ ।  

“गुरुकुलको आफ्नै जग्गाका लागि हामीले प्रयास गरेकै हो । हामी जग्गा खोज्न लागिपरेकै हौं,” उनले भने, “हामीले प्रायः पछिल्लो समयमा हरेक प्रधानमन्त्रीसँग जग्गा उपलब्ध गराउन आग्रह गरेका थियौं । तर, आश्वासन मात्रै पायौं ।” 

भृकुटिमण्डपमा जग्गा दिने आश्वासन उनले पाएका थिए । “प्रायः सबै प्रधानमन्त्रीहरुले हामीलाई हुन्छ भन्नुभयो । हुँदैन कसैले भन्नु भएन्,” उनी भन्छन् । 

गुरुकुलको स्थापना निजी जग्गा भाडामा लिएर भएको थियो । तर, सम्झौताको दुई वर्ष बाँकी हुँदै जग्गाधनीले त्यो ठाँउ खाली गर्न भनेपछि गुरुकुल बन्द भएको थियो । उही कारण पोखरेल निजी जग्गा भाडामा लिएर पुनः गुरुकुल सुरु गर्ने सोचमा थिएनन् । त्यसैले लामो समय गुरुकुल बन्द भएको पोखरेल बताउँछन् । 

“सरकारी जग्गा लिजमा पायौं भने अलि लामो समयसम्मको लिज पाइन्छ अनि स्थायी संरचना बनाउन सकिन्छ भनेर हामी त्यतातिर लाग्यौं । त्यसले पनि हामीलाई रोकेको हो,” पोखरेलले भने । अहिले उनले कुञ्ज थिएटर एकवर्ष भाडामा लिएर गुरुकुल सुरु गरेका छन् । 

यो पटक काठमाडौं महानगरपालिकाका मेयर विद्यासुन्दर शाक्यले गुरुकुलको एक वर्षको भाडाको जिम्मा लिएपछि सुरु भएको हो । 

वि.स २०५९ मा स्थापना भएको ‘गुरुकुल’ले दर्शकलाई रंगमञ्चको स्वाद चखाएको थियो । तर, जग्गा अभावका कारण वि.सं. २०६७ सालमा गुरुकुल बन्द भएको थियो ।