पोखरा । भेडा चराउन गएका म्याग्दीका रामबहादुर छन्त्याल बेपत्ता भएका छन । बिहिबार बिहानै भेडा चराउन गएका उनी बेपत्ता भएको म्याग्दीका सहायक प्रमुख जिल्ला अधिकारी धिरेन्द्रराज पन्तले जानकारी दिए । 

उनकाअनुसार गुर्जाको सुकेलोट्नेमा भारी हिउँ परेपछि भेडिगोठ बस्ने ५० वर्षीय  छन्त्याल बेपत्ता भएका हुन् ।

छन्त्यालसँगै भेडा चराउन गएका अन्य तीनजना भने सम्पर्कमा आएका छन् । बस्तीदेखि टाढाको गोठमा बस्दै आएका जगदेवी छन्त्याल, बुद्धि छन्त्याल र लालबहादुर विक भने हिउँमा फसेको म्याग्दीका प्रहरी प्रमुख डिएसपी श्यामकुमार राईले जानकारी दिए ।
गुर्जा भन्ने ठाउँ हिमाली जिल्ला म्याग्दीको धवलागिरी गाउँपालिका १ मा पर्छ । 

घटना हुनासाथ गृहमन्त्रालयमा जानकारी गराइएको र उद्धारका लागि हेलिकोप्टर बोलाइएको सूचना अधिकारी पन्तले जानकारी दिए ।

गृहमन्त्रालयले हेलिकप्टर पठाएपनि बिहीबार भने उनीहरूको उद्धार हुन सकेन । हेलिकप्टर पोखरा फर्किएको र शुक्रबार पुन: उद्धार गरिने उनले जानकारी दिए । भौगोलिक रूपमा विकट र दुर्गम क्षेत्रमा पर्ने गुर्जा जोड्ने पदमार्ग, विद्युत र मोबाइल फोन सेवा पनि अवरुद्ध छ । छिमेकी वडा लुलाङबाट गुर्जा पुग्न एक दिन पूरै हिँड्नुपर्छ ।

यता, मनाङमा पनि बुधबारदेखि हिमपातका कारण बाटो भुलेर एकजना बेपत्ता भएका छन । भेडीगोठमा काम गर्ने नासो गाउँपालिका ४ का ५३ वर्षीय आछुयु गुरुङ बुधबारदेखि हराइरहेका छन । तीनजनाको समूहमा गएका गुरुङ भेडीगोठ सार्ने क्रममा जंगलमा हराएका हुन् । 

मनाङका प्रमुख जिल्ला अधिकारी रविन्द्र प्रसाद आचार्यकाअनुसार गुरुङ गोठबाट गाउँ फर्कने क्रममा बाटो भुलेर सम्पर्कविहीन भएका हुन् । 

बुधबार बिहान गोठमा गएका गुरुङ जंगलमा हिउँ पर्ने हुँदा गाउँ फर्किँदै थिए । उनीभन्दा छिटो हिँड्ने साथीहरू गाउँमा फर्के । तर, व्यापक हिमपातका कारण र विस्तारै हिँड्दा उनी जंगलमा नै हराएका हुन् । उनको खोजीकार्य भइरहेको प्रजिअ आचार्यले जानकारी दिए ।