काठमाडौं । ‘दलन’ अर्थात् एकताकाको चर्चित नेपाली टेलिशृंखला । त्यसको काली पात्रबाट उदाएकी अभिनेत्री हुन्, दिया मास्के ।

आधिकारिक रूपमा दियाको अभिनय यात्रा सोही टेलिशृंखलाबाट सुरु भएको हो । हुन त त्यसअघि पनि उनले एउटा टेलिशृंखलामा काम गरेकी थिइन । तर, त्यो एक दिनको अनुभव उनका लागि ‘नमिठो सपना’भन्दा कम छैन ।

उनी भन्छिन्, “त्यो मेरो लागि नाइटमेयरभन्दा फरक पर्दैन । त्यो एक दिनको अनुभवले नै म अभिनय गर्दिनँ भनेर माइन्ड मेकअप बनाइसकेको थिएँ ।” त्यसको सम्झना भने एकदमै धुमिल रहेको उनी बताउँछिन् ।

अभिनय पेसालाई परिवारबाट सिधै ‘रातो झन्डा’ देखाइएको थियो । उनले कत्थक र भरत नाट्यममा स्नातकोत्तर गरेकी थिइन् । तर, नाचेर हिँड्ने भन्दा पनि यसको गुरुका रूपमा मात्रै काम गर्न अनुमति थियो ।

ग्लामर दुनियाँमा प्रवेश
दिया एसएलसीपछि नै ग्लामर दुनियाँमा प्रवेश गरिसकेकी थिइन् । पकेट खर्च र कलेजको शुल्क उनी म्युजिक भिडियो र मोडलिङबाटै जोहो गर्थिन् ।

गायिका मनीला सोताङको ‘भिज्यो सिरानी’को भिडियोमा उनले गरेको अभिनय देखेर ‘दलन’का नबीन सुब्बा, अनुप बरालले अडिसनका लागि बोलाएका थिए । त्यो बेला उनी स्नातकको परीक्षा दिएर बसेकी थिइन् ।

दलनको कार्यशालाबाट उनले अभिनयलाई मन पराउन थालिन् र गहन रूपमा लिन थालिन् । त्यसपछि दियालाई अभिनयको हुटहुटी जाग्यो र यसमै करियर बनाउँछु भन्ने सोच पलायो ।

दलनको छायांकन त्यति सजिलो थिएन । माओवादी द्वन्द्वकालको समय । टेलिशृंखला पर्वतको खौला, कुस्मालगायत दुर्गम क्षेत्रमा छायांकन गर्नुपर्ने थियो । पुल, टेलिफोन सेवा अवरुद्ध । ४० दिनका लागि भनेर गएको दलन टिमको छायांकन करिब ६ महिना लाग्यो । त्यसबाट उनले पाएको पारिश्रमिक २५ हजार रुपैयाँ थियो ।

डिजिटल फिल्मकी पहिलो अभिनेत्री 
दिया डिजिटल फिल्मकी पहिलो अभिनेत्री पनि हुन् । अर्थात्, नेपालमा डिजिटल प्रविधिबाट छायांकन सुरु भएको पहिलो चलचित्र ‘कागबेनी’मा दिया, निमा रुम्बा, सौगात मल्ललगायत कलाकारको अभिनय थियो ।

ठूलो पर्दाका उनका केही चलचित्र अन्तर्राष्ट्रिय अवार्ड समारोहहरूमा पनि पुग्यो । तर, ती चलचित्रमा उनको केही अन्तरंग दृश्यहरूका कारण आलोचना पनि खेप्नुपर्‍यो ।

दिया विस्तारै चलचित्रको पर्दामा कम देखिन थालिन् । उनी भन्छिन्, “काम पाइनँ । अझ भन्नुपर्दा काम नपाएको होइन, एकदमै ग्यापमा मात्रै पाउँथे । कर्मसियली आउनुपर्ने रहेछ । राम्रो काम गरेर मात्रै नहुने रहेछ । अहिलेको अवस्था त्यस्तो छैन । तर, जब मैले सुरु गरेँ, त्यस्तो चलचित्र बनाउने भनेको चुनौती मोल्नु नै थियो ।”

डकुमेन्ट्री जनराको चलचित्र गरिरहेकाहरूलाई त्योबाहेक अरू गर्न सक्दैनन् भन्ने गरिएको उनको आरोप छ । चलचित्र नपाउनुको अर्को कारण, आफ्नो हक्की र सटिक स्वभाव पनि हो कि भन्ने उनलाई लाग्छ ।

“मेरो कामबाट मैले जति प्रशंसा पाएको छु, त्योअनुसार कम काम पाएको छु जस्तो लाग्छ,” उनी भन्छिन् ।

रोडिजले तनाव
नेपालमा भएका अन्तर्राष्ट्रिय फ्रेन्चाइजी शोहरूमध्ये ‘हिमालय रोडिज’ राम्रो चर्चा कमाइरहेको रियालिटी शोमध्ये एक हो । युवावर्गमाझ लोकप्रिय यो शोकै कारण आफू नेपाली युवापुस्तामाझ पुगेको उनको ठहर छ ।

अचेल दियालाई चलचित्र र मिडियामा त्यति धेरै देखिँदैन । तर, जब–जब चलचित्रको पर्दा र रियालिटी शोहरूमा आउँछिन्, आलोचना पनि खेप्नुपर्छ । रोडिजको चौथो सिजनसम्म आउँदा आफूले धेरै आलोचना र गाली खेप्नुपरेको उनी बताउँछिन् ।

“धेरै आलोचना सुन्नुपर्‍यो । १२ लाख कमेन्टमा ११ लाख कमेन्टमा गाली खाइयो । तर, बुझ्नुपर्ने कुरा के हो भन्दाखेरी रोडिज सुरु गर्दा मलाई यत्तिकै ‘ग्याङ लिडर’को रूपमा लिएको होइन,” दिया भन्छिन्, “मलाई अरू प्रतियोगीहरूजस्तै बकाइदा अडिसनबाटै लिनुभएको हो । मभन्दा अघि सातजना अभिनेत्रीहरूको लिस्ट पठाइएको थियो रे, तर सबैजना रिजेक्ट हुनुभयो ।”

आफू त्यति धेरै रुखो नभएको र जिम्मेवारी पूरा गरेको उनको भनाइ छ । “मैले मेरो काम मात्रै गरेको हुँ । म व्यक्तिगत रूपमा त्यति रुड पनि छैन । हो, म स्ट्रेटफोर्वाड छु । तर, शोमा देखिएजस्तो रुड छैन । धेरै गाली खाएँ मैले,” उनी भन्छिन्, “एक समय त्यस्तो पनि आयो, मलाई अब म सक्दिनँ जस्तो पनि लाग्यो । किनभने, तल्लो लेवलसम्म गएर गाली गर्नुहुन्थ्यो ।” आफूले चाहेर भन्दा पनि शोको फर्म्याटानुसार त्यसरी प्रस्तुत भएको उनी बताउँछिन् ।

तर, अहिले उनको प्रस्तुति सुरुको जस्तो कडा छैन । आलोचनापछि हच्किनुभएको हो भन्ने प्रश्नमा उनी भन्छिन्, “पछि हटेको होइन, शोको फर्म्याट परिवर्तन भएको हो । इन्डियन रोडिज नै हेर्नुहोस्, फर्म्याट चेन्ज भइसकेको छ ।”

पछिल्लो समय रियालिटी शोहरू ‘स्क्रिप्टेड’ हुन्छन् भन्ने टिप्पणीको दिया खण्डन गर्छिन् । “स्क्रिप्टेड होइन । तपाईंले यही बोल्नुपर्छ, यही भन्नुपर्छ भनेर स्क्रिप्ट दिने होइन । मानौँ, म पो कलाकार हुँ र मैले टिमले दिएको स्किप्टलाई फलो गर्न सक्छु । तर, आउने प्रतियोगीहरू त कलाकार होइन नि । उहाँहरूलाई त्यो समयमा जे लाग्छ, जे सोच्नुहुन्छ त्यही भन्ने हो ।”

सपना साकार बनाउन हातेमालो 
थिएटरमा प्रवेश गर्दा रंगकर्मी अनुप बराल र उनको सम्बन्ध गुरु र शिष्यको थियो । त्यो सम्बन्ध श्रीमान्–श्रीमतीमा रूपान्तरित भइसकेको छ ।

अनुपको एउटा सपना आफ्नो जन्मथलो पोखरामा ‘आर्ट हब’ निर्माण गर्नु रहेको छ । जहाँ थिएटर, चित्रकला, अभिनय, गायनलगायत विधामा रहेकाहरूका लागि छलफल गर्ने एउटा ठाउँ होस् भन्ने हो । विशेष प्राथमिकतामा भने नाटकघर छ ।

श्रीमान्को यही सपनालाई पूरा गर्न उनी हातेमालो गरिरहेकी छन् । अबको ६ महिनामा त्यसलाई सञ्चालनमा ल्याउने तयारी भइरहेको उनले बताइन् ।

अब फेरि चलचित्र र डान्समा धेरै समय दिने उनको योजना छ । दिया चाँडै नै चलचित्र ‘प्रकाश’ र अर्को एउटा चलचित्रमार्फत फेरि दर्शकसामु आउँदै छिन् ।