काठमाडौं । हिमाली जिल्ला हुम्लामा तीन दिनदेखि भारी हिमपात हुँदा नाम्खा गाउँपालिकाका गाउँहरू दुई दिनदेखि सम्पर्कविहीन छन । चीनको सिमानासँग जोडिएका नाम्खा गाउँपालिकाका हिल्सा, लिमी, यारी र मुचु गाउँ सम्पर्कविहीन भएका हुन् ।

जिल्ला प्रहरी कार्यालय हुम्लाका प्रहरी नायब उपरीक्षक हेरम्भ शर्माले सोमबार बिहानदेखि सम्पर्क हुन नसकेको जानकारी दिए । ‘‘अहिले सिमकोटमा पानी परिरहेको छ । नाम्खा गाउँपालिकाका गाउँहरूमा भने हिउँ परिरहेको छ । हिल्सा, लिमी, यारी र मुचु गाउँमा मंगलबार बिहानदेखि निरन्तर सम्पर्क गर्न खोजिरहेका छौँ । तर, सम्पर्क भइरहेको छैन,” उनले बाह्रखरीसित भने, ‘‘हिमपात हुँदा मोबाइल, इन्टरनेट, वाइफाइ सबै सेवा अवरुद्ध हुन्छ । ती गाउँको पछिल्लो अवस्थाबारे केही जानकारी लिन पाइएको छैन ।”

लगातार हिमपात भइरहेकाले इन्टरनेट सेवा अवरुद्ध भएको, मोबाइलमा चार्ज नहुँदा र नेपाल टेलिकमको टावर बिग्रिँदा सम्पर्क हुन नसकेको उनको भनाइ छ । ‘‘सोमबारसम्म हिल्सा नाकामा एक फिट हिउँ जमिसकेको खबर आएको थियो । पछिल्लो समय सम्पर्क हुन सकिरहेको छैन । हिँडेर वा गाडी लिएर त्यहाँ जान सकिने अवस्था छैन,” उनले भने ।

हुम्लाका तीन हजार ८०० मिटरभन्दा माथि सबै ठाउँमा हिमपात भएको छ । हिल्सामा सशस्त्र प्रहरीको सीमा सुरक्षा चौकी, नेपाल प्रहरीको सुरक्षा चौकी, होटेल व्यवसायी पनि छन् । उनीहरूसँग पनि दुई दिनदेखि सम्पर्क हुन नसकेको प्रहरीले जनाएको छ ।

जिल्ला प्रशासन कार्यालय हुम्लाका अनुसार सिमकोटमा अहिले पानी परिरहेको छ । चार दिनदेखि निरन्तर पानी पर्दा हवाई सेवा अवरुद्ध छ । हुम्लाका प्रमुख जिल्ला अधिकारी गणेश आचार्यले भने, ‘‘यहाँको जनजीवन धेरै नै अस्तव्यस्त बनेको छ । घरबाहिर निस्कन सकिने अवस्था पनि छैन । हिल्सानाका नारालेक क्षेत्रमा बसोबास गर्ने नागरिक बढी प्रभावित भएका छन । पूरै नाकाहरू बन्द छन् । बत्ती छैन । सोलारबाट मोबाइल चार्ज गर्दै आएका थियौँ, घाम नलाग्दा चार्ज गर्न पनि मिल्दैन, मोबाइल अफ छन् ।”

उता, वर्षा र हिमपातसँगै खार्पुनाथ गाउँपालिका–५, खर्पेलगाउँमा पहिरो जाँदा एकै परिवारका ६ जनाको मृत्यु भएको जनाइएको छ ।

प्रजिअ आचार्यका अनुसार चीनसँग जोडिएका गाउँहरूबाट हुम्ला सदरमुकाम सिमकोटसम्म चल्ने सवारीसाधनहरू ठप्प छन् । ‘‘हिजोसम्म सदरमुकाम सिमकोट, खार्पुनाथ गाउँपालिदेखि यांचुकुनासम्म गाडी चलेका थिए । आजदेखि उक्त सेवा पनि ठप्प भइसक्यो । सीमानाकामा सुरक्षार्थ खटिएका सुरक्षाकर्मीहरूसँग सम्पर्क गर्ने कोसिस गरिरहेका छौँ । हुम्लामा पुस–माघतिर पर्ने हिउँ अहिले नै परेको छ,” प्रजिअ आचार्यले भने, ‘‘अहिले यहाँका स्थानीयलाई बालीनाली भित्र्याउने चटारो थियो । धान, कोदो, मकै, फापर, सिमीलगायत अन्नहरू बाढी–पहिरोले बगाएको छ ।”

हुम्लाका अधिकांश गाउँहरूमा हिँडेरै जानुपर्ने भएकाले प्रहरी समयमै घटनास्थलमा पुग्न नसकेको बताइएको छ ।