जनकपुरधाम । कोरोना महामारी नियन्त्रण गर्न धनुषामा गएको वैशाख २१ गतेदेखि जिल्लाभरि निषेधाज्ञा जारी छ । संक्रमण तीव्र रुपमा फैलिएको भन्दै दुई गाउँ ‘सिल’समेत गरिएको छ । तर, प्रदेश राजधानी जनकपुरधाममा निषेधाज्ञाको अटेरी गर्नेहरु प्रशस्तै देखिन्छन् ।

निषेधाज्ञाको आइतबार १८ दिन पुगेको छ । धार्मिक, पारिवारिक र सामाजिक काममा लागि भन्दै स्थानीय बजारमा निस्फिक्री घुमफिर एवं मेलापात गरिरहेको देखिन्छ ।

जनकपुरधाम उपमहानगरपालिकाले शुक्रबार आयोजना गरेको सीआईसीको समीक्षा बैठकमा पनि विज्ञले बजारमा भिड बढेको भन्दै नगरप्रमुख लालकिसोर साहसँग गुनासो गरेका थिए ।

“बजारमा मेलापात बन्द भएको छैन । यो तत्काल कम्तीमा तीन साता बन्द भएन भने स्थिति भयावह हुनसक्छ,” स्वास्थ्य निरीक्षक अभयकुमार सिंहले प्रशासन र नगरप्रमुखको ध्यानाकर्षण गराउँदै भने, “बजारमा कतै स्वास्थ्य मापदण्ड पालना भएको छैन । पसलहरु पनि दिनभरि खुल्ने गरेको छ ।”

जनकपुरधाममा मात्रै १५ सय बढी संक्रमित पुगिसकेको भन्दै आमसर्वसाधारणले मास्कको पनि प्रयोग नगरेको उनले उल्लेख गरे । “चोक–बजारको चियापसलदेखि हाट र दैनिक बजारमा भिड बढी छ । स्वास्थ्य सतर्कता पनि खासै अपनाइएको हुँदैन,” उनले भने, “पेठिया बजार र रेलवे स्टेसन बजारमा सेवाग्राहीको थामिनसक्नु भिड हुने गरेको छ ।”

हटिया बिहान र बेलुका मात्र सञ्चालन गर्ने भनिए पनि दिनभरि सर्वसाधारणको चहलपहल हुने गरेको उनको भनाइ छ ।

जनकपुरका चोक–चोकमा उभिएर मास्क लगाउन आग्रह गर्दा पनि सर्वसाधारणले अटेरी गर्ने गरेको धनुषाका प्रहरी नायब उपरीक्षक मकेन्द्र मिश्रले बताए । मास्क नलगाउने थुप्रै मानिस कारबाहीमा परेको उनले उल्लेख गरे ।

कोरोनाभाइरसको दोस्रो लहर सुरु भएयता स्वास्थ्य मापदण्ड पालना गर्न सचेत गराए पनि अटेरी भइरहेको उनी बताउँछन् । “भिडभाड हुन नदिन र मास्क प्रयोगका लागि प्रहरी परिचालन गरे पनि हाटबजार व्यवस्थापन हुन सकेन,” उनले भने, “प्रहरीले हरसम्भव प्रयास गरेको छ । केही दिन पूर्ण रुपमा लागु भए पनि विस्तारै त्यो क्रम घटेको छ ।”

थप तस्बिर हेर्नोस्