-1738748876.jpg)
काठमाडौं । काठमाडौं बुधबार पनि विश्वकै सर्वाधिक प्रदूषित सहर बनेको छ । वायु गुणस्तरको अन्तर्राष्ट्रिय नियामक निकाय आईक्यू एयरको सूचकांकले विश्वका १२४ सहरमध्ये काठमाडौं सर्वाधिक प्रदूषित भएको देखाएको हो ।
आइतबारयता लगातार काठमाडौं यस सूचीको एक नम्बरमा छ । बुधबार बिहान ११ः३० बजे काठमाडौंको वायुको गुणस्तर मापदण्ड (एक्यूआई) २४२ पुगेको आईक्यू एयरको तथ्यांक छ । मंगलबार सोही समयमा काठमाडौंको एक्यूआई २५६ मापन भएको थियो ।
दोस्रो नम्बरमा रहेको भारतको दिल्लीको एक्यूआई २१२ छ । यीबाहेक अन्य सहरमा यो सूचकांक २०० भन्दा कम छ । स्वास्थ्यका दृष्टिकोणले यी दुई सहर अति अस्वस्थकर बनेका छन् ।
वातावरण विभागका अनुसार, काठमाडौं उपत्यकाका पाँच स्थानमा वायु प्रदूषण उच्च छ । बुधबार बिहान ११ः३० बजे काठमाडौंका शंखपार्क र रत्नपार्क, ललितपुरका खुमलटार र भैँसेपाटी तथा भक्तपुर अस्वस्थ्करको सूचीमा छन् । ती स्थानको एक्यूआई १७४ देखि १९५ सम्म मापन भएको छ ।
एक्यूआई १०१ देखि १५० को वायु बालबालिका, वृद्धवृद्धा र दीर्घरोगीका निम्ति अस्वस्थकर हुन्छ । त्यो १५१ देखि २०० सम्म पुगेमा सबैका निम्ति अस्वस्थकर हुन्छ । यस्तै, २०१ देखि ३०० सम्म पुगेमा ‘अति अस्वस्थकर’ र त्योभन्दा माथि भएमा ‘खतरनाक’ तथा बन्दै जाने विश्व स्वास्थ्य संगठन (डब्ल्यूएचओ)को मापदण्ड छ ।