“विद्रोही विचार लिएर
विद्रोही कलाकारहरु
विद्रोही घुुम्तीमा निदाएका 
बुद्धिहरुलाई जगाउन विद्रोह गरिरहेका छन्...।” यी शब्दसहितको फ्रेम भित्तामा छ । वरिपरि सुन्दर चित्रकला सजाइएका छन् । रुफटप जाने भर्‍याङको माथि नेपालका पाँच दिग्गज व्यक्तित्वहरुको स्केच लहरै टाँगिएका छन् ।

दायाँबाट हेर्दै जाँदा पहिलोमा हँसिलो मुहारका हास्यकलाकार जोडी हरिवंश आचार्य र मदनकृष्ण श्रेष्ठ छन् । स्वरसम्राट नायराणगोपाल, महाकवि लक्ष्मीप्रसाद देवकोटा र सगरमाथा आरोही पहिलो नेपाली महिला पासाङल्हामु शेर्पाका मुहारचित्र छन् । यी चित्रले कुनै ग्यालरीमा भएको महसुस हुनसक्छ । तर, यो ठमेलस्थित विद्रोह क्याफे एन्ड बारको दृष्य हो ।

फुड र आर्टको कोल्याबोरेसन हो, ‘विद्रोह’ । पहिलो तलामा ग्यालरी र दोस्रो तलामा सानो ग्यालरीका साथै बसेर आर्ट र फुडको मजा लिन सकिने क्याफे र बार हो । ठमेलको सातघुम्ती चोकसँगै छ, ‘विद्रोह’ । एकैथलोमा आर्ट र फुडको स्वाद दिन सक्नु नै विद्रोहको विशेषता हो ।

‘विद्रोह’ ग्यालरी र इन्टर कन्टिनेन्टल फुडसहितको क्याफे तथा बार हो । यहाँको स्पेसल डिसमध्ये अरबिक, वेस्टर्न र नेपाली कुजीनको फ्युजनहरु हुन् ।

कलाप्रेमी साथीको भेन्चर
रोमेल भट्टराई, अभिषेक कंसाकार र चन्दन लम्साल तीन युवाहरु मिलेर विद्रोह सञ्चालनमा ल्याएका हुन् । उनीहरुले लकडाउन सुरु हुनुभन्दा चार महिनाअघि नेपाली तथा अन्तर्राष्ट्रिय कलाप्रेमी र फुडप्रेमीहरुलाई एकैठाउँमा फुड र आर्टको मजा दिनका लागि यो सुरु गरेका थिए । तर, लकडाउनका कारण बन्द भयो । अहिले विद्रोहले रफ्तार समाउँदै छ ।

यी तीन साथीहरुको यो भेन्चर नयाँ भए पनि उनीहरुको आर्टको सहयात्रा भने सन् २०१० देखि नै सुरु भएको थियो । “हामीले सन् २०१० तिर आर्ट लाइफ सुरु गरेका थियौँ । यसमार्फत हामी विशेषगरी स्ट्रिट आर्ट प्रोजेक्टहरु र आर्ट प्रदर्शनीहरु गर्थ्यौँ । लामो समय पब्लिक स्पेसमा काम गर्दागर्दै अब त ग्यालरी खोलेर आर्ट बेच्नुपर्छ र युवा कलाकारहरुलाई स्पेस दिनपर्छ भन्ने लागेर विद्रोह सुरु गरेका हौँ।” सञ्चालकमध्येका एक भट्टराई भन्छन् ।

विद्रोहको भुइँदेखि भित्ता, सिलिङ हरेक कुना आर्टले सजिएका छन् । यहाँका भित्ता देशी तथा विदेशी र विद्रोहकै सञ्चालकहरुको सुन्दर आर्ट र भनाइहरुले भरिएका छन् ।

सामान्यतया, कन्टेम्पोररी (समकालीन) ग्यालरी, ट्रेडिसनल (परम्परागत) ग्यालरीहरु मात्रै हुन्छन् । तर, यो स्पेस (ग्यालरी)चाहिँ वैकल्पिक अभिव्यक्तिका लागि खोलेको भट्टराई बताउछन् । यहाँको ग्यालरीका आर्ट रेगुलरभन्दा पनि विभिन्न माध्यम जस्तै, स्प्रे, स्टेन्सिल्सजस्तो फरक–फरक उपकरण प्रयोग गरेर तयार पारिएका छन् । भट्टराई र उनको टिमले पनि यी माध्यमको प्रयोग गरी स्ट्रिट आर्ट गर्ने र नेपालसहित विदेशी युवाहरुलाई प्रशिक्षण दिने पनि गर्छ ।

“हामीले विद्रोहमार्फत आर्ट, फुड र म्युजिकलाई जोडेर एउटा लाइफस्टाइल क्रियट गर्न खोजेका छौँ,” उनी अगाडि थप्छन्, “यहाँ कलाकारहरु एकार्कासँग बसेर आइडिया एक्सचेन्ज गर्न सक्छन् । बायर्ससँग फुडको मजा लिँदै कलाबारे लामो गफ गर्न सक्छन् ।” आफूहरुको उद्देश्य युवा क्रियटिभ कलाकारलाई स्पेस दिनु र कलाको युवा ग्राहक बढाउनु समेत भएको उनीहरुको भनाइ छ ।

परिकारमा फ्युजन
विद्रोहको मेनुमा नेपाली मात्रैभन्दा पनि नेपाली र विदेशी दुवै ग्राहकलाई ध्यानमा राख्दै तयार पारेको फ्युजन पाइन्छ । यी फ्युजन मेनुमा सेट हुनुअघि टेस्टमा फरक नपरोस् भनेर विद्रोह टिम आफैँले धेरैपटक टेस्ट गरेपछि मात्रै ग्राहकलाई सर्भ गरिन्छ ।

यहाँ मांसाहारी, शाकाहारी र भेगन तीनैथरी फुड पारखीहरुको स्वादलाई विशेष ध्यान दिइएको छ । यहाँ हेल्डी अरबिक परिकार पनि चाख्न पाइन्छ । शाकाहारी र भेगनहरुका लागि विद्रोहको स्पेसल कोर्समा चिल्ड टोफु विथ स्पिनिच एन्ड सोया सेसेमिसस र अरबिक मेजेट प्लाटर रहेको छ ।

उसिनेको स्पिनिच (पालक)माथि चिल अर्थात् चिसो फ्रिजमा राखिएको टोफुको सानो–सानो टुक्रा राखिन्छ । सोया सेस्मी सस र सेस्मी स्ड्सि राखेर सजाएपछि चिल्ड टोफु विथ स्पिनिच एन्ड सोया सेसेमिसस सर्भका लागि लागि तयार हुन्छ ।

हरेक साताको शुक्रबार र शनिबार ‘विद्रोह स्पेसल’मा पाइन्छ, फ्रेस सी–फुड । अरबिक कुजिन किनावा र मिक्स पेपरसहित ग्रिल्ड प्राउनको स्वाद यो कुजिनमा लिन सकिन्छ । फ्रिजमा राखिएको चिल प्राउनलाई तातो तेल भएको प्यानमा फ्राइ गरिन्छ । भित्रसम्म मज्जाले पाकोस् भनेर त्यसलाई केही छिन छोपेर पकाइन्छ । अनि, प्लेटमा किनावा राखिन्छ । त्यसको माथि फ्राई गरेको प्राउन राखिन्छ । त्यससँगै थोरै स्यालेड, आधा काटेको कागती राखेर सानो बाउलमा केही अमिलो स्वादको सस राखिन्छ । यसलाई अझै आकर्षक देखाउन ती सबैमाथिबाट थोरै बाल्समिक ग्रेस र ग्रिन ओइलले सजाइन्छ ।

रोस्टेड चिकेन विथ रोजमेरी पोटेटो, मिक्स मःम प्लाटर पनि यहाँको स्पेसल कुजिन हो । मिक्स हरियो, रातो, खैरोलगायत थरीथरी रङ र स्वादमा मिक्स मःम प्लाटर ममप्रेमीहरुका लागि तयार पारिएको विशेष फ्युजन हो । यसमा पटेटो एन्ड चिज मःम, स्पिनिज एन्ड चिज, सोया विथ बेलबेटो मःम, पोर्क मःम, चिकेन मःम र बफ मःमको स्वाद एकैप्लेटबाट लिन सकिन्छ ।

एक हजार रुपैयाँ बोकेर गए विद्रोहको कुनै एउटा मेन कोर्स, एउटा ड्रिंक लिन सकिन्छ । विद्रोह यो क्षेत्रका अन्य रेस्टुरेन्टभन्दा सस्तो भएको ग्राहकहरुको प्रतिक्रिया रहेको सञ्चालकको दाबी छ ।

“मजाले खाना र कलाको स्वाद लिइसकेपछि बिल तिर्दा मुख बिगार्नु नपरोस् भन्ने हाम्रो उद्देश्य हो । फेरि–फेरि हामीलाई सम्झिइयोस् भन्ने हो,” भट्टराईले भने ।

नाम र काम
नामजस्तै विद्रोहका सञ्चालकहरु आर्टमार्फत सकारात्मक परिवर्तनका लागि ‘विद्रोह’ गरिरहेका छन् । यहाँ सजाइएका हरेक आर्टले युवाहरुको सोच र देश र प्रणालीमाथि विद्रोह पोखिरहेकोजस्तो भान हुन्छ ।

ग्यालरीमा विदेशी कलाकार बक्सीको पेन्टिङको सिरिज छ । उनले विभिन्न देश घुमेर पेन्टिङ गरिसकेका छन् । भ्रमणको रुपमा नेपाल उनको ८६औँ देश हो । साथै, अमेरिकी, नेपाली कलाकारका कला एकैथलोमा प्रदर्शनीमा राखिएका छन् ।

पेन्टिङ बेचेर आएको कमाइको ७० प्रतिशत कलाकारलाई र बाँकी ३० प्रतिशत विद्रोह टिम अर्थात ग्यालरीलाई जान्छ ।

सञ्चालक भट्टराई भन्छन्, “यो भेन्चर भनेको हाम्रो त्यत्रो वर्षको मिहिनेतको फल नै हो । स्ट्रिटमा काम गर्ने, पब्लिक स्पेसमा काम गर्ने, अब आफ्नै ग्यालरी चाहियो, पेन्टिङ बेच्नुपर्‍यो भन्ने सोचर यो खोलेका हौँ ।”

तस्बिर तथा भिडियो ः सुनिल प्रधान