एजेन्सी । इङ्ल्यान्ड र आयरल्यान्डबीचको एकदिवसीय सिरिज आजबाट सुरु हुँदै छ । खेल नेपाली समयअनुसार साँझ ६ः४५ बजेबाट सुरु हुनेछ । 

यस प्रतियोगितालाई भारतमा आयोजना हुने तय भएको एकदिवसीय विश्वकप २०२३ को छनोटका रूपमा हेरिएको छ । यसलाई अन्तर्राष्ट्रिय क्रिकेट परिषद् (आईसीसी) ले  ‘विश्वकप सुपर लिग’ समेत भनेको छ । यसै तीन खेलको एकदिवसीय सिरिजबाट सुपर लिगको आरम्भसमेत हुनेछ ।

इङ्ल्यान्डको कप्तानी इयान मोर्गानले सम्हाल्नेछन् भने आयरल्यान्डको उपाधि एन्डी बालबेर्नेले सम्हाल्नेछन् । खेल रोज बउल साउथ ह्यामटनमा हुनेछ । 

पछिल्ला पाँच खेलको नतिजा हेर्ने हो भने इङ्ल्यान्ड आयरल्यान्डमाथि निकै नै हाबी देखिएको छ । पछिल्ला पाँच खेलमा इङ्ल्यान्ले चार खेल जित्दा एक खेल नतिजाविहीन भएको छ । 

तर, यस सिरिजमा आयरल्यान्डलाई यसअघिको इङ्ल्यान्डको दबदबा तोड्ने सुनौलो अवसर छ । इङ्ल्यान्डका प्रायः मुख्य खेलाडी पाकिस्तानसँगको टेस्ट सिरिज खेल्ने टोलीमा छन् । यस कारण आयरल्यान्ड इङ्ल्यान्डलाई पराजित गर्दै जितको सुरुवात गर्ने दाउमा मैदानमा उत्रिनेछ ।