काठमाडौं । नेपालले ३८औँ बंगलादेश एमेच्योर गल्फ च्याम्पियनसिपको टिम इभेन्टमा स्वर्ण पदक जितेको छ । बंगलादेशको ‘बी’ टिमलाई १६ स्ट्रोकले माथ दिँदै नेपालले स्वर्ण हात पारेको हो । सदभाव आचार्य र राहुल विकको जोडीले इभन–पार २८८ स्कोर गरे ।

सदभावले आज ३–अन्डर ६९ को स्कोर निकाल्दा राहुलले ४–ओभर ७६ स्कोर दर्ज गरे । नेपालले आज १–ओभर १४५ को स्कोर बनायो । पहिलो दिन नेपालले १–अन्डर १४३ स्कोर जोडेको थियो । सदभावले टिमतर्फ स्वर्ण जितेको यो दोस्रोपटक हो । यसअघि ३६औँ संस्करणमा सुवास तामाङसँग उनले स्वर्ण हात पारेका थिए ।

बंगलादेशको ‘बी’ टिमका शफिकुल इस्लाम र रोमन मियाको जोडी दोस्रो भए । १६–ओभर ३०४ स्कोरसहित घरेलु टिमले रजत पदक हात पा¥यो । यो जोडीले आज १०–ओभर १५४ स्कोर ग¥यो शफिकुलले आज ४–ओभर ७६ र रोमनले ६–ओभर ७८ मा खेल सकाए । बंगलादेशको ‘ए’ टिमका अबु बकर सिद्दिकी र मोहम्मद साहबुद्धिनको जोडीले कास्य पदक प्राप्त गरे। उनीहरूले कुल १८–ओभर ३०६ को स्कोर निकाले ।

नेपाल नम्बर एक सदभाव आचार्यले व्यक्तिगत स्पर्धामा ३६ होलको समाप्तिमा आठ स्ट्रोकको अग्रता बनाएका छन् ।  बंगलादेशका मोहम्मद साहबुद्धिनलाई आठ स्ट्रोकले पछि पार्दै शीर्षस्थानमा कायमै रहन सफल भएका हुन् । पहिलो दिनका लिडर सदभावले दोस्रो दिन पनि ३–अन्डर ६९ स्कोर निकाले ।

सदभावले आज १०औँ होलबाट खेलको सुरूआत गरे । १०औँ र ११औँ होलमा एक–एक सट बचाउँदै राम्रो सुरुआत गरे । तर १४औँ होलमा एक सट खेर फाले । १७औँ होलको बर्डीले फ्रन्ट नाइन २–अन्डर ३४ मा पूरा गरे । यसपछि तेस्रो होलमा बर्डी प्रहार गरे पनि चौथो होलमा डबल बोगीको सामना गरे ।  पाँचौँ र नवौँ होलमा बर्डी प्रहार गर्दै ब्याक नाइन १–अन्डर ३५ मा सकाए ।  

बंगलादेशका मोहम्मद साहबुद्धिन समग्रमा २–ओभर १४६ स्कोरमा दोस्रो स्थानमा रहेका छन् । उनले आज २–ओभर ७४ को स्कोर निकाले । श्रीलंकाका चुलिथा पुष्पिका तेस्रो स्थानमा छन् । उनले आज ३–ओभर ७५ खेल्दै समग्रमा ५–ओभर १४९ स्कोर गरे । नेपालका राहुल विके र बंगलादेशका शफिकुल इस्लाम ६–ओभर १५० सहित संयुक्त रूपमा चौथो स्थानमा रहेका छन् । उनीहरूले आज समान ४–ओभर ७६ को प्रदर्शन गरे ।

३६ होलको समाप्तिमा २९–ओभर सम्म खेलेका ५२ गल्फरले कट बनाएका छन् । प्रतियोगितामा कुल १०० खेलाडीको सहभागिता रहेको थियो ।