काठमाडौं । सरकारले परराष्ट्र मन्त्रालयका कायममुकायम सचिव अमृतबहादुर राईलाई सचिवमा बढुवा गर्ने निर्णय गरेको छ । सिंहदरबारस्थित मन्त्रालयमा शुक्रबार आयोजित पत्रकार सम्मेलनमा सरकारका प्रवक्ता एवं सञ्चार तथा सूचना प्रविधिमन्त्री पृथ्वीसुब्बा गुरुङले गएको मंगलबार बसेको मन्त्रिपरिषद् बैठकबाट राईलाई सचिवमा बढुवा गर्ने निर्णय गरिएको जानकारी दिए ।

उनले मन्त्रिपरिषद् बैठकबाट सशस्त्र प्रहरी नायब महानिरीक्षकहरू कमल गिरी, गणेशबहादुर ठाडामगर, कुलबहादुर नेम्वाङ र शम्भु सुवेदीको पदावधि एक वर्ष थप गर्ने निर्णय समेत गरिएको बताए ।

यस्तै, मन्त्रिपरिषद्ले आउँदो फागुन १२ देखि १५ गतेसम्म इटालीको रोममा आयोजना हुने जलवायु परिवर्तनसँग सम्बन्धित कार्यक्रममा सहभागी हुन वन तथा वातावरण राज्यमन्त्रीलाई स्वीकृति दिने निर्णय गरेको छ ।

सहसचिव विष्णुप्रसाद शर्मालाई विशिष्ट संरचना सञ्चालन तथा व्यवस्थापन विकास समितिको कार्यकारी निर्देशकका रूपमा काम गर्ने गरी काजमा खटाउने निर्णय गरिएको उनले बताए ।

उनले यही पुस २६ र २७ गते काठमाडौंमा हुने नेपाल–भारत वाणिज्यसचिवस्तरीय अन्तरसरकारी समितिको बैठकमा सहभागी हुन उद्योग, वाणिज्य तथा आपूर्ति मन्त्रालयका सचिवको संयोजकत्वमा वार्ता टोली गठन गरिएको पनि जानकारी दिए ।

आउँदो माघ २८ देखि ३० गतेसम्म फिलिपिन्सको मनिलामा सञ्चालन हुने वर्कसप अन इन्हान्सिङ एसआई–सीएसओ इन्गेजमेन्ट इन द एएसओएसएआई रिलिजन कार्यक्रममा सहभागी हुन उपमहालेखापरीक्षक वामदेव शर्मा अधिकारीलाई स्वीकृति प्रदान गर्ने निर्णय पनि मन्त्रिपरिषद्‌बाट गरिएको उनले बताए । न्युज एजेन्सी नेपाल