काठमाडौं । रमजान महिना सकिएको दिन इस्लाम धर्मावलम्बीले आज इद–उल–फित्र मनाउँदै छन् ।

अरबी पात्रो हिजरी संवतअनुसार दशौं महिनाको पहिलो दिन अर्थात् रमजान महिना सकिएको दिन आज मुस्लिम समुदायले विशेष नमाज (प्रार्थना) आदा (समर्पण) गरी इद–उल–फित्र मनाउने गर्छन् । अरबी पात्रोअनुसार नवौं महिनाको अन्तिम दिन चन्द्रमा देखिएपछि भोलिपल्ट इद–उल–फित्र मनाउने गरिन्छ । 

इदमा विशेष नमाज आदा गरिसकेपछि आफूभन्दा ठूलाबडाबाट आशीर्वाद लिने र आफूभन्दा सानालाई आशीर्वाद दिने गरिन्छ । 

इदका दिन इस्लाम धर्मावलम्बीहरूले मस्जिद तथा इदगाहमा भेला भई सामूहिक रूपमा नमाज आदा गर्ने परम्परा छ । तर, यस वर्ष भने कोरोना भाइरस (कोभिड–१९) रोकथामका लागि लकडाउन जारी भएपछि मस्जिदमा सामूहिक रूपमा नमाज आदा नगर्न मुस्लिम आयोगले आग्रह गरेको छ । 

मस्जिदमा गई समूहमा नमाज आदा गर्न नपाएपछि घरमै परिवारका सदस्यबीच नमाज आदा गरेर इद–उल–फित्र मनाइँदै छ । त्यसैले इदका दिन काठमाडौंमा रहेका दुई मस्जिद पनि सुनसान देखिएका छन् । मस्जिदमा रहेका धर्मगुरु र कर्मचारीले मात्र प्रार्थना गरेका छन् । सरकारले इदको अवसरमा आज देशभर सार्वजनिक बिदा दिएको छ । हेरौं थप तस्बिर :