काठमाडौं । आज वैशाख पूर्णिमा अर्थात् २५६४औं बुद्ध जयन्ती । भगवान गौतम बुद्धको जन्म भएको आजको दिनलाई बौद्ध धर्मावलम्बीले बुद्ध जयन्तीका रूपमा मनाउँछन् । ईशापूर्व ५६३ मा आजकै दिन सिद्धार्थ गौतमको जन्म लुम्बिनीमा भएको थियो ।

बुद्ध जयन्तीका दिन बुद्धको जन्मस्थल लुम्बिनीमा मायादेवीको मन्दिरलगायत देशभरका बैद्ध बिहार तथा गुम्बामा दर्शन, पूजापाठ र प्रार्थना गरी मनाउने चलन छ । यस वर्ष भने कोरोना भाइरस संक्रमणको महामारी रोकथाम तथा नियन्त्रणका लागि देशव्यापी गरिएको लकडाउनको कारण कुनै सार्वजनिक कार्यक्रम नगरी बुद्ध जयन्ती मनाइएको छ । 

काठमाडौंको स्वयम्भू पनि सुनसान बन्यो । यहाँ बुद्ध जयन्तीमा हुने पूजापाठ गरिए पनि भक्तजन पुगेनन् । सरकारले बुद्ध जयन्तीको अवसरमा घर–घरमा दीपावली गर्न आह्वान गरेको छ । यस्तै बुद्ध जयन्ती समारोह समितिले पनि घरमै बसेर बुद्ध जयन्ती मनाउन आग्रह गरेको छ ।

यसबीच २५६४औं बुद्ध जयन्तीका अवसरमा राष्ट्रपति विद्यादेवी भण्डारीले शुभकामना सन्देश जारी गर्दै बुद्धका उपदेश र मार्गदर्शनको परिपालनाले राष्ट्रिय एकतालाई सुदृढ बनाउन सकिने विश्वास व्यक्त गरेकी छन् । उनले विविधताबीच एकताको खोजी गर्दै आपसी मेलमिलापका साथ शान्ति र प्रगतिको पथमा अघि बढ्न उत्साह उमङ्ग र प्रेरणा प्रदान गर्ने अपेक्षासमेत व्यक्त गरेकी छन् । 

प्रधानमन्त्री केपी शर्मा ओलीले पनि विश्व शान्तिको चाहनामा तड्पिरहेको र बुद्धका सन्देशहरु अझ बढी सन्दर्भिक भइरहेको बताउँदै शुभकामना व्यक्त गरेका छन् ।

बुद्ध जयन्तीका अवसरमा काठमाडौंको स्वयम्भूमा आज बिहानै देखिएका थप दृष्य :