नेपालमा पहिलो संक्रमित भेटिँदा चीनमा कोरोनाभाइरसले महामारीको रूप लिइसकेको थियो । संसद्, सामाजिक सञ्जाल र सरकारलाई कोरोनाभाइरसको संक्रमण रोक्न आवश्यक उपाय अपनाउन दबाब दिइयो । सरकारका मन्त्रीहरूले संसद् र सार्वजनिक मञ्चहरूमा जनताको चासोलाई हाँसोमा उडाए । स्वास्थ्य तथा जनसंख्यामन्त्री भानुभक्त ढकाल र संस्कृति, पर्यटन तथा नागरिक उड्डयनमन्त्री योगेश भट्टराईले आफ्ना त्यति बेलाका गलत अभिव्यक्तिका लागि अहिलेसम्म सार्वजनिक माफी मागेका छैनन् । नेपाली समाजले पनि लाग्छ यो संकटका बेला तिनको आपत्तिजनक अभिव्यक्ति बिर्सिसकेको छ । अहिले सामाजिक सञ्जाल र सञ्चार माध्यम हेर्दा लाग्छ पछि कुनै दिन त्यसको हिसाबकिताब गरे पनि अहिले ध्यान दिनुपर्ने विषय अरू नै छन् । संकटका बेला गर्नुपर्ने काम अरू नै छन् । दुर्भाग्य, सरकारी अधिकारीहरूको भने नियतमै शंका गर्नुपर्ने देखियो । 

सरकारले कोरोनाभाइरस परीक्षण गर्ने सामग्री त किन्यो भनेर आश्वस्त नेपाली जनताको विश्वास दुई दिन पनि टिक्न सकेन । अहिले सरकारले किनेको केही सामग्री भरपर्न नसकिने रहेछ । विश्वसनीयतामा शंका भएकाले विश्व स्वास्थ्य संगठनले प्रयोग नगर्न निर्देश गरेको सामग्री नेपालले किनेछ । स्वास्थ्य मन्त्रालयले त्यो ‘र्‍यापिड टेस्ट किट’ भनिने सामग्री प्रयोग नगर्न निर्देशन दिएको समाचार छ । सामन खरिद गर्ने निर्णय गर्दा अपनाइएको प्रक्रिया उत्तिकै विवादास्पद भयो । सम्पूर्ण सामग्रीको खरिदमा नियोजितरूपमै आर्थिक अनियमितता गरिएको आरोप सञ्चार माधयम र सामाजिक सञ्जालमा सप्रमाण लगाइएको छ । आर्थिक अनियमितताको आरोपमा संकट समाधान भएपछि छानबिन गरेर अख्तियारको दुरुपयोग भएको देखिए कारबाही गरेहुन्छ ।

ढिलै भए पनि संकटको बेला हुनालेस्वास्थ्य सामग्री खरिद गर्दा सरकार इमानदार रहेको होला भन्ने धेरैलाई लागेको थियो । परन्तु, यो र्‍यापिड टेस्ट किटको खरिद सरकारको इमानदारीको पनि कसी हुन पुग्यो । सरकार विफल भयो । स्वास्थ्य मन्त्रालयभित्र वा बाहिरका कसैले यसका बारेमा सञ्चार माध्यमलाई जानकारी नदिएको भए विश्व स्वास्थ्य संगठनको निर्देशन उल्लंघन गर्दै त्यही किट प्रयोग गरिनसक्थ्यो । नक्कली परिणाम दिने किटले संक्रमित व्यक्तिलाई भाइरसमुक्त देखाउन सक्थ्यो । त्यसरी भाइरसमुक्त देखाइएको व्यक्ति समाजमा घुलमिल भएपछिको अवस्था अकल्पनीय हुनसक्थ्यो । नेपाललाई यो संकटबाट जोगाउने ती गुमनाम व्यक्तिलाई धन्यवाद । तिनले साँच्चै नै कसैको गुनको नभएर नुनको सोझो गरे । तिनको भलो होस् । । तर, परीक्षणको नतिजा नै भरपर्न नसकिने सामान किनेर जनताको स्वास्थ्यमा खेलाँची गर्ने अपराधका लागि भने सम्बन्धित व्यक्तिले क्षमा पाउनु हुँदैन । जानाजान काम नलाग्ने किट किन्नेहरूमाथि कारबाही जति छिटो हुन्छ सरकारप्रति विश्वास उही गतिमा फर्कन्छ ।