दाङ । दुई करोडभन्दा बढी ठगी र बलात्कार आरोपमा दाङमा एक व्यक्तिलाई प्रहरीले पक्राउ गरेको छ।

तुलसीपुर उपमहानगरपालिका-११ उरहरी बलेगनार घर भई हाल घोराही उपमहानगरपालिका १५ मा बस्ने ४० वर्षीय महेश भनिने भुवन धिताललाई तीन महिलालाई बलात्कार गरेको र दुई करोड रुपैयाँ ठगी गरेको आरोपमा दाङ प्रहरीले पक्राउ गरेको हो । धिताल जिल्लामा सञ्चालन हुने एक अनलाइनमा आबद्ध पत्रकार भएको पाइएको छ। बलात्कार र ठगी आरोपमा पक्राउ परेका धिताललाई दाङ प्रहरीले शुक्रबार सार्वजनिक गरेको हो।

जिल्ला प्रहरी कार्यालय दाङले पत्रकार सम्मेलन गरी बलात्कार र ठगी आरोपमा पक्राउ परेका पत्रकारलाई धिताललाई सार्वजनिक गरेको हो। धिताल जयवीर मिडिया प्रालिद्वारा संचालित जलजला खबर डटकमका पत्रकार भएको प्रहरीले जनाएको छ।

बलात्कार र ठगीको उजुरी परेपछि महेश भनेर चिनिने ४० वर्षीय भुवन भागेर नेपालगञ्जबाट काठमाडौ जान लागेको सूचनाको आधारमा उनलाई बाँके र दाङको सीमाना अमिलिया नजिकैबाट पक्राउ गरिएको दाङ प्रहरी प्रमुख बेलबहादुर पाण्डेले बताए।

पाण्डेले धितालको सम्पत्तिमा समेत छानविन गरिने बताए। नियन्त्रणमा लिई अदालतबाट म्याद थप गरेर उनको र उनीसँग सम्बन्धित व्यक्तिको थप अनुसन्धान भइरहेको दाङका प्रहरी प्रमुख एसपी पाण्डेले बताए।

धितालको साथबाट वा १५ च ७६६८ नं को सेतो फोर्ड गाडी १, भे ८ प ३९५५ नं.को होण्डा स्कुटी एक, ८२ वटा चेक चेकमा उल्लेख गरेको एक करोड उनन्सत्तरी लाख रुपैयाँ, खाली चेक २ थान, विभिन्न व्यक्तिलाई गराएका तमसुक ३२ वटा, तमसुकमा भएको रकम एक करोड चौविस लाख, ढुकुटी खेलाएको रजिष्टर, चारवटा, खाली तमसुक, चारवटा, पत्रकार परिचय पत्र एक थान मोबाइल, २ थान, नगद अठार हजार पाँच सय रुपैयाँ, सुनको औंठी दुईवटा ब्रासलेट एक वटा, र घडी एक थान बरामत गरेको छ।

समुदायमा जाने महिलालाई ठगी गर्ने धम्काउने शारीरिक शोषण गर्ने, ढुकुटी खेलाउने र ३६ प्रतिशत ब्याज लिनेलगायतका कार्य गर्ने र कसैले केही भने पत्रकार हुँ भनि धम्काउने गरेको प्रमुख पाण्डेले बताए।

उनले धितालविरुद्ध अहिलेसम्म तीनवटा जबरजस्ती करणीको मुद्दा दर्ता भइसकेको जानकरी दिए । अदालतबाट पाँच दिनको म्याद थप भएकाले थप अनुसन्धान भइरहेको जनाए। ठगी मुद्दामा उनीलगायत पाँच जनाविरुद्ध उजुरी परेको छ।