दाङ । दाङको बबई गाउँपालिकामा २०७४ सालको स्थानीय निर्वाचनमा एमालेका भुवनेश्वर पौडेल अत्यधिक मतका साथ अध्यक्षमा निर्वाचित भए । काँग्रेसका उमेदवारभन्दा धेरै मतान्तरले बबईमा एमालेले आफ्नो गढ सावित गर्दै विजयको झन्डा फहरायो । 

त्यसपछिका संसदीय निर्वाचनमा पनि बबई एमालेकै गढ बनेर उभियो । प्रदेश सभा सदस्य, प्रतिनिधिसभा सदस्यमा एमाले उमेदवारका लागि बबई नै निर्णायक शक्तिका रूपमा देखियो । बबईकै कारण विजय प्राप्त पनि ग¥यो । प्रदेश सभाको ७६ मा भएको उप–निर्वाचनमा पनि बबईको मत नै नेकपाका उमेदवारका लागि सति सावित भयो ।

यस पटकको स्थानीय निर्वाचनमा पनि एमालेले जित्ने पालिकामा बबई एक नम्बरमै थियो । उमेदवारी दर्तादेखि मत गणनासम्मको अवस्थासम्म एमालेले बबई गुमाउनेमा कुनै आशासमेत गरेको थिएन । तर, अहिलेको स्थानीय निर्वाचनमा बबईमा एमालेले लज्जास्पद हार बेहोरेको छ । एमालेको गढमा नेपाली कांग्रेसले विजयको झण्डा फहरायो । 

कांग्रेसका कुलबहादुर खत्री ठूलो मतान्तरसहित बबईमा उदाएका छन् । उपाध्यक्ष, बहुमत वडाअध्यक्षसहित बबईमा कांग्रेसले धेरैपछि विजयको झन्डा गाडेको छ ।

दाङको राप्ती गाउँपालिका कांग्रेसको गढ हो । गाविस हुँदादेखि नै कांग्रेसको एकक्षत्र राज रहेको राप्ती गाउँपालिका यो स्थानीय निर्वाचनले कांग्रेसको गढ भत्किएको छ । यस पटकको निर्वाचनमा कांग्रेस राप्तीमा तेस्रो शक्तिको रूपमा देखिनु नै गढ भत्किएको प्रमाण हो । राप्तीमा काँग्रेसको गढलाई माओवादी केन्द्रले भत्काएर आफ्नो विजयको झन्डा गाडेको छ ।

७० पछिका सबै निर्वाचनमा राप्ती गाउँपालिका कांग्रेसका लागि महत्त्वपूर्ण क्षेत्र र निर्णायक मत भएको क्षेत्रका रूपमा रहँदै आएको थियो । तर, यस पटक २ हजारभन्दा बढी मतान्तर राखेर माओवादी केन्द्रले पालिकामा विजयको झन्डा फहराएको छ । दाङको दंगीशरण गाउँपालिका एमालेको गढ भएको पालिका हो । २०७४ सालको स्थानीय निर्वाचनमा पालिका जितेको एमालेले त्यसपछिका दुईवटा निर्वाचनमा पनि एमालेमय नै भयो । तर, यस पटकको निर्वाचनले कांग्रेसलाई दंगीशरणमा फर्काइदिएको छ ।

दंगीशरणमा अहिले अध्यक्ष उपाध्यक्षसहित बहुमत वडाध्यक्षमा कांग्रेसका उमेदवारहरूले सानदार मतान्तरमा विजय प्राप्त गरेका छन् । यस पटकको निर्वाचनले एमाले गढ भत्काएर कांग्रेसको उदय गराइदिएको छ । शम्भु गिरी अध्यक्षसहित उपाध्यक्ष र बहुमत वडाध्यक्ष दंगीशरणमा कांग्रेसले जितेको छ ।

गढवा गाउँपालिका पनि २०७४ मा एमालेकै गढ सावित भयो । २०७४ पछिका निर्वाचनमा पनि एमाले राम्रो पकेट भएको क्षेत्रका रूपमा गढवालाई चित्रण गरियो । निर्वाचनमा निणार्यक मत गढवाले प्रस्तुत ग¥यो । तर, यस पटकको निर्वाचनमा गढवा गाउँपालिकामा कांग्रेस विजयोन्मुख देखिएको छ । यहाँ एमाले तेस्रो स्थानमा झरेको छ । माओवादी केन्द्र र कांग्रेस प्रतिस्पर्धामा छन् । पालिकामा कांग्रेसका सर्वजित डिसीको प्यानल विजयोन्मुख छ ।

शान्तिनगर गाउँपालिका र राजपुर गाउँपालिकामा नेपाली कांग्रेसले आफ्नो गढ प्रमाणित गरेको छ । २०७४ सालको स्थानीय निर्वाचनमा जितेका यी दुई पालिका अहिले निर्वाचनमा पनि नेपाली कांग्रेसले जोगाएर राख्न सफल भएको हो । राजपुरमा शरद बुढाथोकी अध्यक्षमा र धनपति यादव उपाध्यक्षमा निर्वाचित भइसकेका छन् । शान्तिनगरमा पनि अध्यक्षमा प्रमोद बस्नेतसहितको टिम निर्वाचित भइसकेको छ । बहुमत वडाअध्यक्ष उपाध्यक्षसहितले जित हात पारेका छन् ।

दाङमा यसरी हेर्दा फरक दलको गढलाई भत्काउँदै आफ्नो विजयको यात्रामा दलहरू लागेका छन् भने कति दलहरूले आफ्नो विरासत जोगाउन सकेका छैनन् । 

सल्यानमा पनि यसपटक माओवादीका गढ भत्काएर कांग्रेसले विजयको झन्डा फहराउन थालेको छ । ५१ सालपछि लोप भएको कांग्रेस ७४ सालमा देखिएको छ । माओवादीको गढ भएको कुमाख गाउँपालिकामा कांग्रेसका उमेदवारहरू विजयी भएका छन् । एमालेको गढ भएको सिद्धकुमाखमा पनि कांग्रेसले विजय प्राप्त गरेको छ ।