काठमाडौं । साफ च्याम्पियनसिप फुटबलको दोस्रो भुटानविरुद्धको खेलमा नेपालले शानदार जित निकालेको छ । भुटानमाथि जित निकालेपछि नेपाली रााष्ट्रिय फुटबल टोलीका प्रशिक्षक बालगोपाल महर्जनले समूह चरणको अन्तिम खेल बंगलादेशमाथि पनि जुनसुकै हालतमा जित निकाल्ने दाबी गरेका हुन् ।

उनले भने, “भुटानविरुद्धको खेलमा हामीले धेरै गोल गर्ने अवसर पायौं तर, ४ गोल मात्रै भए । अब दोस्रो खेल हामी जुनसुकै हालतमा जित्छौं ।” पाकिस्तानसँग अप्रत्याशित २–१ गोल अन्तरको हार व्यहोरेको नेपालले भुटानविरुद्धको खेलमा डिफेन्सिङ खेल्ने लक्ष्य बनाएको महर्जनले बताएका छन् । उनले भुटानविरुद्धको खेलमा आफुहरुले सक्नेजति सबै क्षमता लगाएको बताए ।

पहिलो खेलमा पराजित भएपछि नेपालले दोस्रो खेलका लागि नयाँ योजनाका साथ मैदान प्रवेश गरेको थियो । महर्जनले आजको खेलमा स्ट्राइकर, मिडफिल्डर र डिफेन्डर सबैले राम्रो खेलेको बताएका छन् । आफुले टिमको नेतृत्व सम्हालेपछि साफ च्याम्पियनसिपमा फोकस भएको समेत उनले उल्लेख गरे । भुटानविरुद्ध नेपालका अनन्त तामाङले २१ औं मिनेटमा गोल गर्दै शुरुवाती अग्रता दिलाएका थिए ।

पहिलो हाफमा १—० गोलले अगाडि रहेको नेपालका लागि सुनिल बलले ७१ औं, भरत खवास ७९ औं र निराजन खड्काले ८८ औं मिनेटमा गोल गर्दै ४—० गोल गर्दै टिमलाई जित दिलाएका थिए । नेपालले सेप्टेम्बर ९ मा बंगलादेशसँग खेल्दैछ ।