काठमाडौं । ह्याम्स हस्पिटलले विभिन्न खेलाडीहरुलाई सम्मान गरेको छ । नेपाली खेलकुदमा विषेश प्रदर्शन गर्ने सात जना खेलाडीलाई हस्पिटलले उपहारसहित सम्मान गरेको हो ।
मण्डिखाटारस्थित हस्पिटलमा एक कार्यक्रमको आयोजना गर्दै हस्पिटलका अध्यक्ष रामशरण भण्डारी, वरिष्ट मुटुरोग विषेशज्ञ डा. भगवान कोइराला, डा. भाष्कर राज पन्त लगायतले सम्मान गरेका थिए ।
सम्मानित हुने खेलाडीमा एसियाली शारीरिक सुगठनका स्वर्ण विजेता महेब्वर महर्जन, दक्षिण एसियाली उसुका स्वर्ण विजेता राजकुमार रशाइली, भलिबल खेलाडी कमला पुन, साम्बो खेलाडी कृष्णलाल तामाङ लगायतलाई सम्मान गरेको हो । यस्तै मिक्स मार्सल आर्टसका सन्तोष साउद, बक्सिङका म्याक्स बस्नेत र स्क्वासकी भावना सुनुवार पनि सम्मानित भए ।
अत्याधुनिक चिकित्सा प्रविधिका साथ स्थापना भएको ह्याम्स हस्पिटलले खेलकुद चिकित्सा र खेलका दौरान खेलाडीले ब्यहोर्न सक्ने सम्भावित इन्ज्युरीमा विषेश ध्यान राख्ने उद्धेश्य रहेको छ ।
कार्यक्रममा हस्पिटलका चिकित्सकहरुले खेलाडीले ब्यहोर्न सक्ने सम्भावित इन्ज्युरी कसरी रोकथाम गर्ने, इन्ज्युरी भएको अवस्थामा पनि त्यसको उपचार पद्धती र प्राथमिक उपचारको विषयमा धारणा राखेका थिए ।
खेलकुद स्वास्थका लागि आयोजित अन्तरक्रिया कार्यक्रममा वरिष्ठ चिकित्सक प्रोफेसर डा भगवान कोइरालाले आफु पनि सामान्य खेलाडी भएकाले खेलकुदमा विषेश रुची रहेको प्रतिक्रिया दिए । हस्पिटलले खेलकुद स्वास्थमा खेलाडीलाई विषेश प्राथमिकता दिने बताए ।