काठमाडौं । नेपालमा प्रथम अन्तर्रा्ष्ट्रिय ह्विल चेयर त्रिकोणीय टि – ट्वान्टी क्रिकेट सिरिज हुने भएको छ । नेपाल व्हिलचेयर क्रिकेट एसोसिएसनको आयोजनामा बिहिबारबाट काठमाडौमा अन्तर्रा्ष्ट्रिय व्हिल चेयर त्रिकोणीय टि – ट्वान्टी क्रिकेट सिरिज हुने भएको हो ।
नेपाल व्हिलचेयर क्रिकेट एसोसिएसनले मंगलबार पत्रकार सम्मेलनको आयोजना गर्दै प्रतियोगिता मंसिर २८ बाट सुरु भएर पुस १ गते सम्पन्न हुने जानकारी दिएको हो । शुसील कोइराला मेमोरियल फाउन्डेसनको सहयोगमा हुने तीन दिने प्रतियोगितामा नेपाल, भारत र बंगलादेशको राष्ट्रिय टोलीले खेल्ने छन् । खेल किर्तिपुरस्थित टियु क्रिकेट मैदानमा हुने आयोजकले जनाएको छ ।
लिगका आधारमा हुने प्रतियोगिताको शिर्ष दुई टोलीले फाइनल खेल्ने छन् । खेल अन्तर्रा्ष्ट्रिय क्रिकेट परिषदको नियम अनुसार हुने छ । प्रतियोगितामा कुल ४ खेल हुने व्हिल चेयर क्रिकेट एसोसिएसनका अध्यक्ष छुल्टिम ग्याल्जेन शेर्पाले जानकारी दिए ।
प्रतियोगितामा नेपाल हिमाल अर्यालको नेतृत्वमा मैदान उत्रने छन् । प्रतियोगिताको लागि नेपालले १४ सदसिय टोलीको घोषणा गरिसकेको छ । नेपाली टोलीमा कप्तान हिमालसँगै डिगम सिंह चेम्जोङ, भरत कार्की, राजु कटुवाल, डम्बर थापा, दानबहादुर थिङ, खनि नारायण पौडेल र विष्णु अधिकारी रहेका छन् ।
त्यस्तै जंगबहादुर रुचाल मगर, विपिन पौडेल, यमबहादुर श्रेष्ठ, नवीन राई, राम बहादुर तामाङ र राजु गुरुङ पनि टोलीमा रहेका छन् । नेपाली टोलीको प्रशिक्षण सुधीर चौधरी रहेका छन् ।