काठमाडौं । मुलुकका विभिन्न ठाउँमा गएको बाढीपहिरोबाट कृषि क्षेत्रमा भएको क्षतिको अध्ययन गर्न समिति गठन गरिएको छ । आइतबार कृषि विभागमा कृषि विकासमन्त्री रामकृष्ण यादवको अध्यक्षतामा बसेको वैठकले मन्त्रालयका सचिव डा. सुरोज पोखरेलको संयोजकत्वमा ९ जना सदस्य रहेको समिति गठन गरेको हो ।
बैठकले लगातार भएको वर्षा र बाढीपहिरोबाट भएको क्षति अध्ययन गरी मन्त्रालयबाट तत्कालै गर्न सकिने राहतका सम्बन्धमा समिति गठन गरेको हो । प्रत्येक क्षेत्रका क्षेत्रीय कृषि निर्देशकहरुको नेतृत्वमा टोली गठन गर्ने र सो टोलीले तीन दिनभित्र क्षतिको एकिन विवरण पेश गर्ने मन्त्रालयले जनाएको छ । समितिले खाद्यान्न, माछा, तरकारी, फलफूललगायत भौतिक पूर्वाधारसमेतको यकिन विवरण पेश गर्नेछ ।
मन्त्रालयका अनुसार गठित समितिले आजै (आइतबार) प्रारम्भिक प्रदिवेदन तयार पार्नुका साथै खाद्य सुरक्षा क्लस्टरको बैठक बस्नेछ । त्यस्तै समितिले कृषि विभागले सञ्चालन गर्ने कार्यक्रमका सम्बन्धमा प्रतिवेदन तयार गर्ने छ ।
मन्त्रालयअन्तर्गतका निकाय, बोर्ड, संस्थान, समिति, परियोजना सबैले आ–आफ्नो तर्फबाट गर्न सकिने र तत्कालै परिचालन गरिने विवरण समितिमा पेश गर्न निर्देशन दिइएको छ ।
कृषि विकासमन्त्रीको नेतृत्वमा तत्काल अनुगमन टोली क्षतिग्रस्त क्षेत्रमा जाने र अवलोकन, अनुगमन, समन्वय गर्ने बताइएको छ । अनुगमन गरिएको क्षेत्रमा तत्काल आवश्यक निर्देशन दिने समेत मन्त्रालयको भनाइ छ ।