काठमाडौं । न्यु डायमन्ड एकेडेमी र पश्चिमाञ्चल भलिबल संघले राजधानीमा सुरु केएनपी जापान राष्ट्रिय महिला भलिबल प्रतियोगितामा विजय सुरुआत गरेका छन् । मंगलबार भएको उद्घाटन खेलमा न्यु डायमन्ड एकेडेमीले विभागीय टोली नेपाल पुलिस क्लबलाई ३–० को सोझो सेटमा पराजित गर्यो ।
त्रिपुरेश्वरस्थित राष्ट्रिय खेलकुद परिषद्को कभर्डहलमा पुलिसमाथि एकतर्फी जित निकालेको न्यु डायमन्डले पहिलो सेट २५–१९, दोस्रो सेट २५–१७ र तेस्रो सेट २०–१० ले जित्दै विजय सुरुआत गरेको हो । जितपछि न्यु डायमन्डका प्रशिक्षक कुमार राईले उपाधि जित्ने लक्ष्य लिएर प्रतियोगितामा सहभागिता भएकोले पहिलो जित महत्वपूर्ण भएको बताए । तर, प्रशिक्षक राईले जित निकालेपनि खेलाडीले सोचेजस्तो प्रदर्शन नगरेको बताए ।
यस्तै प्रतियोगिता अन्तर्गत भएको पहिलो खेलमा पश्चिमाञ्चल भलिबल संघले विभागीय टोली त्रिभुवन आर्मी क्लबलाई पनि ३ – ० कै सोझो सेटमा पराजित गर्यो । पश्चिमाञ्चलले आर्मीमाथी २५–२१, २५–१८ र २५–२१ को सेटले पराजित गर्यो ।
शेरबहादुर खड्का स्मृति प्रतिष्ठानको आयोजना सुरु प्रतियोगितामा सशस्त्र प्रहरीको एपीएफ क्लब, न्यु डायमन्ड एकेडेमी, नेपाल पुलिस क्लब, पश्चिमाञ्चल भलिबल संघ, त्रिभुवन आर्मी क्लब र जावलाखेल भलिबल प्रशिक्षण केन्द्र गरी ६ टोलीले लिगकम नकाउटका आधारमा प्रतिस्पर्धा गर्ने छन् ।
प्रतियोगिताका विजेताले एक लाख ५० हजार, उपविजेताले एक लाख र तेस्रो हुने टोलीले नगद ५० हजार रुपैयाँ प्राप्त गर्ने छन् । प्रतियोगिताको सर्वोकृष्ट खेलाडीले नगद १५ हजार रुपैयाँका साथै काठमाडौं मलेसिया, काठमाडौंको आतेजाते हवाई टिकट प्राप्त गर्ने छन् ।
त्यस्तै केएनपी जापान बेस्ट स्पाइकर, केएनपी जापान बेस्ट क्वीकर, केएनपी जापान बेस्ट सेटर, केएनपी जापान बेस्ट ब्लकर, केएनपी जापान बेस्ट डिफेन्स, बेष्ट प्रशिक्षक र केएनपी जापान बेस्ट सर्भर पनि पुरस्कृत गरिने छ । उत्कृष्ट हुने सबै खेलाडीले जनही तीन हजार रुपैयाँसहित आर्कषक ट्रफी प्राप्त गर्ने छन् ।