काठमाडौ । युरोपियन क्लबमा फुटबल खेल्ने लक्ष्यका साथ राष्ट्रिय टोलीका स्ट्राइकर बिमल घर्तीमगर सोमबार स्पेन जाने भएका छन् । स्पेनको मार्बेला युनाइटेड एफसीमा अभ्यास र ट्रायल दिनको लागि बिमल सोमबार त्यसतर्फ जान लागेका हुन् ।

क्लबले अभ्यास र ट्रायलका लागि बोलाएपछि बिमल त्यसतर्फ जान लागेका हुन् । गतवर्ष नेपालले साग गेम्समा स्वर्ण र बंगलादेशमा बगबन्धु गोल्डकप जित्दा महत्वपूर्ण सदस्य रहेको विमललाई क्लबले अभ्यासका लागि बोलाएको थियो । बिमललाई एजेन्ट लुइस डी ब्रायजले अभ्यासको व्यवस्था मिलाएका हुन् । 

क्लबले बिमलसँग अन्य दुई खेलाडी अन्जन बिष्ट र अनन्त तामाङलाई पनि बोलाएको थियो  ।  अन्जन पुस २५ गते नै स्पेन प्रस्थान गरिसकेका छन भने अनन्त त्यसतर्फ जाने छैनन् । एएफसी सोलिडारिटी कपका दौरान घुँडामा चोट लागेको कारण अनन्त त्यसतर्फ नजाने भएका हुन् । गत महिना मात्र घुँडाको शल्यक्रिया गराएका अनन्त अहिले आराम गरिएका छन् ।

नेपाली टोलीका महत्वपूर्ण सदस्यहरु अन्जन र अनन्तले गत बर्ष पनि मार्बेलामा केही साता अभ्यास र मैत्रीपूर्ण खेल खेलेका थिए । गत बर्ष फागुनमा मार्बेलाले नेदरल्यान्ड्स पुगेर मैत्रीपूर्ण खेल खेलेका थिए । उक्त मैत्रीपूर्ण खेलमा अन्जनले केहि क्लबबिरुद्ध गोल समेत गरेका थिए । र, त्यसबेला बिमललाई पनि क्लबले अभ्यासका लागि बोलाएको थियो । तर बिमल चो टका कारण गएनन् । 

स्पेनको मालागामा रहेको मार्बेला युनाइटेड युएस सकर एकेडेमीको शाखाको रुपमा रहेको क्लब हो । सुरुमा युएस सकरकै नाममा स्थापना गरिए पनि यस क्लबले सन् २०१४ मा मार्बेला युनाइटेड एफसी नाम राखेको थियो । यो क्लब स्पेनिस ला लिगाको लागि खेलाडी उत्पादन गर्ने क्लबका रुपमा समेत हेरिन्छ ।