काठमाडौँ । इंग्ल्यान्ड भ्रमणमा रहेको नेपाली राष्ट्रिय क्रिकेट टिमले पहिलो अभ्यास खेलमा जित हात पारेको छ । बिहिबार भएको पहिलो अभ्यास खेलमा फ्रि फोरेस्टर क्रिकेट क्लबलाई १ सय २९ रनको  फराकिलो जित निकाल्दै नेपालले इंग्ल्यान्ड भ्रमणको सुखद सुरुवात गरेको हो ।

इंग्ल्यान्डको इन्डियन जिमखाना स्टेडियममा नेपालले दिएको २ सय ३६ रनको लक्ष्य पछ्याएको फ्रि फोरेस्टर क्रिकेट क्लब २९ ओभर १ बलमा अलआउट हुदै १ सय ६ रनमा समेटियो । फ्रि फोरेस्टर क्रिकेट क्लबलाई सस्तैमा समेट्ने क्रममा नेपालका विक्रम सोवले ४, सन्दिप लामिछानेले २ तथा करण केसी र शक्ति गौचनले एक एक विकेट लिए ।

यसअघि टस हारेर पहिले ब्याटिङ गरेको नेपालले निर्धा्रित ४० ओभरमा ९ विकेट गुमाएर २ सय ३५ रनको योगफल तयार गरेको थियो । नेपालका लागि ओपनरद्वय शरद भेस्वाकर र उपकप्तान ज्ञानेन्द्र मल्लले अर्धशतक बनाए । शरदले ५० रन जोडे भने ज्ञानेन्द्रले ७३ रनको युग्दन दिए । त्यस्तै कप्तान पारस खड्काले ४० रन, सगर पुन २१ तथा राजेश पुलामीले ११ रन जोडे  ।

इंग्ल्यान्ड तथा विश्वकै सबैभन्दा पुरानो क्रिकेट क्लब मेरिलोबोन क्रिकेट क्लब (एमसीसी) सँगको मैत्रीपूर्ण खेलको लागि  इंग्ल्यान्ड भ्रमणमा रहेको नेपाली टोलीले बिहिबार पनि फोरेस्टर क्रिकेट क्लबसंग टि – ट्वान्टी खेल खेल्ने छ । त्यसपछि पनि नेपालले केहि अभ्यास खेल  खेल्ने छ । त्यसपछि नेपालले साउन ४ गते लर्ड्समा एमसीसीसंग मैत्रीपूर्ण खेल खेल्ने छ । खेल ५० ओभरको हुनेछ । नेपाल र ब्रिटेनबीचको कुटनीतिक सम्बन्ध स्थापना भएको २ सय वर्ष पुगेको अवसरमा नेपालको क्रिकेटको मक्का मानिने लर्ड्समा खेल्न लागेको हो । 

यस्तै इंग्ल्यान्ड भ्रमणलाई नेपाली टोलीको विश्व क्रिकेट लिग च्याम्पियनसिप अन्तरगत नेदरल्याण्डसँगको खेलको तयारीका रुपमा समेत हेरिएको छ । नेपालले नेदरल्याण्डसँग आगामी साउन २९ र ३१ गते उसैको मैदानमा खेल्नेछ । विश्व क्रिकेट लिग च्याम्पियनसिपमा तेस्रो चरणको खेल सकिँदा नेपाल नेपाल छैटौं स्थानमा छ ।  

तस्बिर : cricketingnepal.com