काठमाडौं। नेपाली राष्ट्रिय फुटबल टिम र बंगालदेशको राष्ट्रिय टोलीबीच तय भएको दुई खेलको अन्तर्राष्ट्रिय मैत्रीपूर्ण खेल नहुने भएको छ । अखिल नेपाल फुटबल संघ एन्फालाई आइतबार बंगालदेश फुटबल फेडेरेसनले पत्र पठाउँदै सुरक्षाका कारण मैत्रीपूर्ण खेल खेल्न नसकिने जनाएपछि मैत्रीपूर्ण खेल रोकिएको हो ।

बंगलादेशको फुटबल फेडेरेसनले एन्फालाई पत्र पठाउँदै विशेष परिस्थितिका कारण खेल रद्द गरेको जानकारी दिएको हो । तर दुई देशबीच अगस्तको अन्तिमतिर खेल्न प्रस्ताव गरेको जनाएको छ । “अहिलेको अवस्थामा मैत्रीपूर्ण फुटबल आयोजना गर्न हामी असमर्थ छौं ।“ बंगलादेश फुटबल फेडेरेसनले पठाएको पत्रमा लेखिएको एन्फाले जनाएको छ । बंगलादेशमा गत हप्ता मात्रै इस्लामिक स्टेट आइएसका लडाकुले बम विस्फोट गराएका थिए ।

यसअघि नेपाली राष्ट्रिय टोली र बंगलादेशबीच आगामी जुलाई १५ र १७ (असार ३१ र साउन २) मा दुई मैत्रीपूर्ण खेल खेल्ने तय भएको थियो । बंगलादेशसँग मैत्रीपूर्ण खेलका लागि एन्फाले नेपाली टोलीको घोषणा समेत गरिसकेको थियो । नेपालले अनील  गुरुङको कप्तानीमा बंगलादेशसँग अन्तराष्ट्रिय मैत्रीपूर्ण खेल खेल्ने भएको थियो । बंगलादेश फुटबल फेडेरेसनको पत्रसँगै नेपाली टोलीको बंगलादेश भ्रमण पनि रद्द भएको एन्फाले जनाएको छ ।