खेल
एजेन्सी, पेरीस । १५ औँ सस्करणको युरोपियन च्याम्पियनसिप (युरोकप) फुटबलको उपाधि भिडन्त आगामी आइतबार राती फ्रान्सको पेरिसमा हुदैछ । पेरीसस्थित स्टेड डी फ्रान्स रंगशालामा नेपाली समयअनुसार पौने १ बजे हुने फाइनलमा आयोजक फ्रान्स र पोर्चुगल भिड्दै छन् ।
बिहीबार राती भएको दोस्रो सेमिफाइनलमा विश्वकप विजेता जर्मनीलाई २ – ० ले पराजित गर्दै फ्रान्सले फाइनलमा स्थान पक्का गरेको हो । पोर्चुगल पनि वेल्सलाई २–० ले नै पराजित गर्दै फाइनलमा पुगेको हो । यस्तोमा दुई पटकको युरो बिजेता फ्रान्सले १६ वर्षपछि युरोकप फुटबलको फाइनल खेल्दै छ भने पोर्चुगलले १२ वर्षपछि फाइनल खेल्दै छ ।
फ्रान्सले सन् २००० को युरोकप जितेपछि पहिलोपटक फाइनलमा पुगेको हो । यस्तै पोर्चुगलले अहिलेसम्म युरोकपको उपाधि जित्न सकेको छैन । पोर्चुगल सन् २००४ मा घरमै आयोजना भएको युरोको फाइनल पुगेको थियो । तर, फाइनलमा ग्रिससँग हारेपछि पोर्चुगलले दोस्रो स्थानमा चित्त बुझाउनुपरेको थियो । यस्तोमा आइतबार राती हुने फाइनल भिडन्तमा फ्रान्स पोर्चुगल आमनेसामने हुँदै छन् । र, दुवै टोली युरोकपको उपाधि जित्न चाहन्छ ।
फ्रान्स र पोर्चुगल युरोपियन फुटबलको महारथीहरु हुन् । र, आइतबार राती १५ औँ सस्करणको युरोकपको फाइनलमा फ्रान्स र पोर्चुगल भिड्दाको केही तथ्यहरु भने रोमान्चक बन्ने अनुमान गरिएको छ । किनकि दुई टोलीबीचको पछिल्ला नतिजा भने पोर्चुगलको पक्षमा छैन ।
पोर्चुगलले सन् १९७५ को मार्चदेखि अहिलेसम्म फ्रान्सलाई हराउन सकेको छैन । त्यसैले आइतबार राती फ्रान्सबिरुद्ध उसैको मैदानमा उत्रदा पोर्चुगललाई पछिल्ला १० खेलमा जित हात पार्न नसकेको यथार्थले सताउने छ । फ्रान्स भने आफ्नो अपराजित यात्रालाई लम्बाउन चाहन्छ ।
हुनपनि पोर्चुगलले फ्रान्सलाई हराउन नसकेको ४ दशक बढी भैसकेको छ । सन् १९७५ को मार्चमा भएको मैत्रिपूर्ण खेलमा २–० को जित हात पारेको पोर्चुगलले त्यसपछि फ्रान्सलाइ मैत्रीपुर्ण र ठूला प्रतियोगितामा हराउन सकेको छैन । पोर्चुगलले फ्रान्ससँगको पछिल्लो १० भेटमध्ये ३ पटक ठूला प्रतियोगितामा भिडेका छन् । यसक्रममा सन् २००० को युरोको सेमिफाइनल र २००६ को विश्वकपको सेमिफाइनलमा फ्रान्ससँग पराजित भएको थियो । त्यसअघि सन् १९८४ को युरोको सेमिफाइनलमा पनि पोर्चुगल फ्रान्ससँग पराजित भएको थियो ।
तर, रियल मड्रिडका स्टार क्रिष्टियानो रोनाल्डोको कप्तानीमा मैदान उत्रने पोर्चुगललाइ यसपटक हारको शृंखला रोक्न र उपाधिबिहीन यात्रा टुंगाउन चाहन्छ । त्यस्तै समकालीन समयको खेलाडीमध्ये उत्कृष्ट खेलाडीमा पर्ने रोनाल्डोलार्इ युरोपियन च्याम्पियनसीपमा अहिलेसम्म हात पार्न नसकेको सफलता हात पार्ने अवसर छ । र, रोनाल्डोलाई आफ्नो टोलीले जित्ने बिश्वास समेत छ ।
“१२ बर्षअघि र अहिले निक्कै फरक छ । त्यसबेला म १८ बर्षको थिएँ र मेरो लागि त्यो पहिलो ठूला प्रतियोगिता र पहिलो फाइनल थियो ।” रोनाल्डोले फाइनलबारे भनेका छन, “अहिले त्यसको १२ बर्ष बितिसकेको छ र फेरि हामी ठूला प्रतियोगिताको फाइनलमा पुगेका छौं । मैले त्यसबेला पोर्चुगलका लागि उपाधि जित्ने सपना देखेको थिए र आशा गर्छु अहिलेको हम्रोलागी उपयुक्त समय हो ।”
तर जर्मनी जस्तो ठुला टोलीलाई पाखा लगाएर फाइनल पुगेको आयोजक फ्रान्सबिरुद्ध रोनाल्डोको पोर्चुगललाई कठिन चुनौती हुने छ । किनकि डिडियर डेसच्याम्पको प्रशिक्षणमा रहेको लेस ब्लुजको टिममा एन्टोनी ग्रीजम्यान जस्ता चलाख फरवार्डको साथ रहेको छ । उनै ग्रिजम्यानले दुई गोल गरेपछि फ्रान्सले जर्मनीलाई हराउँदै फाइनलमा स्थान पक्का गरेको हो । अब फाइनलमा पनि ग्रीजम्यान आफ्नो राम्रो प्रदर्शन जारी राख्दै प्रतियोगिता शानदार बनाउन चाहन्छन ।
“हामी जुलाई १० मा हुने फाइनलको सपना लिएर प्रतियोगिता सुरुवात गरेका थियौं, जुन पूरा भएको छ ।” जर्मनीविरुद्ध दुई गोल गरेका ग्रीजम्यानले भनेका छन, “हामीसँग अझै एक खेल बाँकी छ । तर फाइनलमा पनि हाम्रो प्रदर्शन यस्तै हुनेछ । हामी प्रतियोगिताको शानदार अन्त्य गर्न चाहन्छौं ।” ग्रीजम्यान प्रतियोगितामा अहिलेसम्मको सर्बाधिक गोल कर्ता पनि हुन् । उनले जारी प्रतियोगितामा ६ गोल गरिसकेका छन् ।
त्यसमाथि यूरोकप फुटबलमा फ्रान्सको इतिहास निकै समृद्ध छ । फ्रान्सले सन् १९८८ बाहेक सबै संस्करणको युरोकप खेल्दै आएको छ । सन् १९८४ मा मिचेल प्लाटिनीप्रेरित फ्रान्सले घरेलु मैदानमा युरोपियन च्याम्पियनसिप जितेको थियो । त्यसको १४ वर्षपछि फ्रान्सेली समर्थकलाई जिनेदिन जिदानप्रेरित टोलीले १९९८ मा घरमै भएको विश्वकपको उपाधि दिलाएको थियो । सन् १९९८ मा घरेलु मैदानमा फ्रान्सको कप्तानका रूपमा विश्वकपको उपाधि उचालेका डेसच्याम्पले घरेलु मैदानमै हुने युरोकपमा प्रशिक्षक भएर राष्ट्रिय टोलीको नेतृत्व गरिरहेका छन् । र, डेसच्याम्पलाई प्रशिक्षकका रुपमा पनि युरोकपको उपाधि जित्न मौका समेत छ । त्यसपछि फ्रान्सले सन् २००० को युरो जितेको छ ।
प्रकाशित मिति: शुक्रबार, असार २४, २०७३ १७:०४
प्रतिक्रिया दिनुहोस्