खेल
एजेन्सी
पेरिस । वेल्सलाई पराजित गर्दै पोर्चुगल फ्रान्समा जारी युरोपियन च्याम्पियनसिप (युरोकप) फुटबलको फाइनलमा प्रवेश गरेको छ । बुधबार राती भएको पहिलो सेमिफाइनलमा वेल्सलाई २ – ० ले पराजित गर्दै पोर्चुगल उपाधि नजिक पुगेको हो ।
लियोनस्थित स्टेड डी लियोनमा भएको खेलमा दोस्रो हाफको तिन मिनेट भित्र दुई गोल गर्दै पोर्चुगलले फाइनल यात्रा तय गरेको हो । पोर्चुगलको जितमा स्टार स्ट्राइकर क्रिष्टियानो रोनाल्डो र नानी एक एक गोल गरे । अब उपाधिका लागी जर्मनी र आयोजक फ्रान्सबीचको दोस्रो सेमिफाइनल विजेतासंग खेल्ने छ । दोस्रो सेमिफाइनल बिहिबार राती हुनेछ ।
पहिलो हाफ गोल रहित बराबरी सकिएको खेलको ५० औ मिनेटमा कर्नरमा हेड गोल गर्दै रोनाल्डोले पोर्चुगललाई सुरुवाती अग्रता दिलाए । त्यसको तिन मिनेट नबित्दै ५३ औ मिनेटमा नानीले गोल गर्दै पोर्चुगलको अग्रता दोब्बर बनाए । त्यसपछि दुवै टोलीले केहि गोलको अवसर पाएपनि गोल गर्न नसक्दा पोर्चुगलले २ – ० को जितसहित फाइनलमा स्थान बनाउन सफल भयो ।
युरोकपमा पहिलोपटक सहभागिता जनाएको वेल्सले पोर्चुगलविरुद्ध कुनै चमत्कार गर्न सकेन । वेल्सका ग्यारेथ बेलले केहि गोलको प्रयास गरेपनि गोल हुन् नसक्दा वेल्स सेमिफाइनलबाट बाहिरिन पुग्यो । बेलकाे प्रहार पोर्चुगलका किपरले बचाएका थिए । त्यस्तै पोर्चुगलका खेलाडीले समेत गोलको केहि अवसर खेर फालेको थियो ।
वेल्स ५८ वर्षपछि ठूलो प्रतियोगिता खेलेको हो र पहिलो सहभागितामै सेमिफाइनल यात्रा तय गरेको हो । उसले अन्तिम पटक ६८ वर्षअघि विश्वकप खेलेको थियो । त्यसपछि वेल्सले ठुला प्रतियोगितामा सहभागिता थिएन । त्यस्तै वेल्सले सन् १९७६ मा युरोकप खेलेको थियो । तर, त्यतिबेला सेमिफाइनलपछिका खेललाई मात्र युरोमा अन्तिम चरण मानिन्थ्यो । त्यसैले वेल्सले प्राविधिक रूपमा पहिलोपल्ट युरो खेलेको हो ।
यता, पोर्चुगल भने युरोकपको फाइनलमा दोस्रो पटक पुगेको हो । यसअघि पोर्चुगल सन् २००४ मा घरमै आयोजना भएको युरोको फाइनल पुगेको थियो । तर फाइनलमा ग्रिससँग हारेपछि पोर्चुगलले दोस्रो स्थानमा चित्त बुझाउनुपरेको थियो । त्यस्तै पोर्चुगल सन् २००० र २०१२ मा सेमिफाइनलबाट बाहिरिएको थियो ।
प्रकाशित मिति: बिहीबार, असार २३, २०७३ ०३:०४
प्रतिक्रिया दिनुहोस्