एजेन्सी, पेरिस । फ्रान्समा जारी युरोपियन च्याम्पियनसिप (युरोकप) फुटबलको सेमिफाइनल भिडन्त बुधबारबाट सुरु हुँदै छ । आइतबार राती अन्तिम क्वाटरफाइनलमा आइसल्याण्डलाई पराजित गर्दै फ्रान्स सेमिफाइनल प्रवेश गरेसँगै युरोकपको सेमिफाइनल समीकरण पुरा भएको थियो ।

 

जारी १५ औँ सस्करणको युरोकपको अन्तिम चारमा आयोजक फ्रान्ससँगै पोर्चुगल, वेल्स र जर्मनीले स्थान बनाएका छन् । बुधबार राती हुने पहिलो सेमिफाइनलमा पोर्चुगलले वेल्सको सामना गर्नेछ । त्यस्तै दोस्रो सेमिफाइनलमा  बिहीबार राती फ्रान्सले जर्मनीको सामना गर्ने छ ।

 

 

 

फ्रान्स युरोकपको पहिलो बिहीबार राती सेमिफाइनलमा पोर्चुगल र वेल्स भिड्दै छन् । दुई टोलीबीच योसँगै चौथो पटक भिड्न लागेका हुन् । यसअघि दुई टोलीबीच तीन पटक आमनेसामने भएका छन् । जसमा पोर्चुगलले २ खेल जितेको छ भने एक खेल वेल्सले जितेको छ ।

 

अन्तिम १६ मा क्रोएसियालाई पराजित गरेको पोर्चुगलले क्वाटरफाइनलमा पोल्याण्डलाई पराजित गरेको थियो । यस्तै अन्तिम १६ मा नर्दन आयरल्याण्डलाई पराजित गरेको वेल्सले क्वाटरफाइनलमा बेल्जियमलाई पराजित गरेको थियो ।

पहिलो सेमिफाइनलमा दुई टोलीबीचको भिडन्तलाई रियल मड्रिडका दुई स्टार क्रिष्टियानो रोनाल्डो र ग्यारेथ बेलबिचको भिडन्तका रुपमा हेरिएको छ ।

 

 

किनकि वेल्स र पोर्चुगल टिममा बेल र रोनाल्डोबाहेक अन्य स्टार खेलाडी छैन । र, बेल र रोनाल्डो रियल मड्रिडमा टिममेट हुन् । दुबैले आफ्नो टोलीलाई सेमिफाइनल तय गराउन निकै महत्वपूर्ण भूमिका खेलेका छन् । त्यसैले वेल्स र पोर्चुगलबिचको भिडन्तलाई बेल र रोनाल्डोसँग जोडिएको छ ।

 

फ्रान्स युरोकपमा पोर्चुगललाई सशक्त टोली मानिएको थियो । समूह चरणमा पोर्चुगल समूह ‘एफ’मा पर्यो । जुन तुलनात्मक रुपमा कमजोर टोली रहेको समूह मानिन्थ्यो । यस समूहबाट दोस्रो चरण पुग्ने टोलीमा स्टार खेलाडी क्रिष्टियानो रोनाल्डो रहेको पोर्चुगललाई नै मानेका थिए ।

 

तर, पोर्चुगलले समुह चरण पार गर्न उत्कृष्ट तेस्रो हुनुपर्यो । उसले समूहचरणको तीन वटै टोलिसँग बराबरी खेल्यो । तर, त्यसपछि पोर्चुगलले बिस्तारै लय समात्दै सेमिफाइनलको यात्रा तय गरेको हो । यस्तोमा पोर्चुगल टोलीलाई  स्टार खेलाडीको साथ रहदै आएको छ ।

 

पोर्चुगलको टोलीमा भेट्रान खेलाडीदेखि नयाँ खेलाडीको बाहुल्यता उतिकै छ । टोलीमा ३८ वर्षे चेल्सीका पूर्व भेट्रान सेन्टर डिफेन्डर रिकार्डो कार्भालोदेखि नयाँ युवा खेलाडीहरु १८ वर्षे रेनाटो सान्चेज, विंगर बेर्नार्डो सिल्भा र मिडफिल्डर विलियम कार्भालो र जोओ मारियो छन्  । त्यस्तै पोर्चुगल टोलीमा क्रिष्टियानो रोनाल्डो र नानीको उपस्थिति पोर्चुगलका लागी फलदायी रहदै आयको छ ।

 

तर, पोर्चुगलको मुख्य हतियार कप्तान रोनाल्डो नै हुने छन् । जुन रोनाल्डोले यसअघिका खेलबाट प्रमाणित गरिसकेको छ । खासगरी नकआउट चरणमा स्थान बनाउन पोर्चुगलले हंगेरीसँग ३–३ को बराबरी खेल्दा रोनाल्डोले दुई गोल गरेका थिए भने अर्को गोलका लागी पास मिलाएका थिए ।  र, रोनाल्डो आफ्नो टोलीबाट दोस्रो पटक युरोकपको फाइनल खेल्न चाहन्छन् ।

 

२००४ मा घरमै आयोजना भएको खेलमा ग्रिससँग हारेपछि दोस्रो स्थानमा चित्त बुझाउनुपरेको थियो । त्यस्तै पोर्चुगलले सन् २००० र २०१२ मा सेमिफाइनलसम्म पुगेको पोर्चुगल क्रमशः फ्रान्स र स्पेनसँग पराजित भएपछि प्रतियोगिताबाट बाहिरिएको थियो ।

 

वेल्सलाई फ्रान्स युरोमा सबैले कौतुहलताका साथ हेरेका थिए । किनकि वेल्सले पहिलोपटक युरोकपमा सहभागिता जनाउदै थियो । र, वेल्सले सवैको अपेक्षाकृत नतिजा ल्याउदै अन्तिम चार सम्मको यात्रा तय गरिसकेको छ । अब, बुधबार हुने सेमिफाइनलमा जित निकाल्दै वेल्स एतिहासिक सफलता हात पार्न चाहन्छ ।

 

समुह बिको बिजेता बन्दै अन्तिम १६ मा पुगेको थियो । वेल्ससँग बेल बाहेक अन्य स्टार खेलाडी छैन । जसका लागी क्लब फुटबलकै सबैभन्दा महंगा खेलाडी ग्यारेथ बेलले सशक्त प्रदर्शन गरेका थिए । र, ५८ वर्षपछि ठूलो प्रतियोगिता खेलेको वेल्स पहिलो पटक युरोपियन च्याम्पियनपसिपको सेमिफाइनलमा पुगिसकेको छ । समूह चरणमा तीन गोल गरेका बेलले  त्यसपछिका दुई खेलमा भने गोल गरेका छैनन् । तर, वेल्सले यहाँसम्म यात्रामा बेलको भूमिका उच्च छ ।

वेल्स लामो समयपछि अन्तर्राष्ट्रिय फुटबलको ठूलो प्रतियोगितामा फर्किएको हो । उसले अन्तिम पटक ६८ वर्षअघि विश्वकप खेलेको थियो । त्यसपछि वेल्सले ठुला प्रतियोगितामा सहभागिता थिएन । त्यस्तै वेल्सले सन् १९७६ मा युरोकप खेलेको थियो । तर, त्यतिबेला सेमिफाइनलपछिका खेललाई मात्र युरोमा अन्तिम चरण मानिन्थ्यो । त्यसैले वेल्सले प्राविधिक रूपमा पहिलोपल्ट युरो खेलेको हो ।