![रोनाल्डो 'बेच्न'का लागि होइनन् : प्रशिक्षक टेन ह्याग](https://12khari.top/uploads/posts/Ronaldo not for sale1657544251.jpg)
काठमाडौं । म्यानचेस्टर युनाइटेडका प्रशिक्षक एरिक टेन ह्यागले सोमबार क्रिस्टियानो रोनाल्डो ‘बिक्रीका लागि नभएको’ बताएका छन् ।
इङ्लिस प्रिमियर लिगको क्लब युनाइटेड अहिले ‘प्री–सिजन टुर’का लागि थाइल्यान्ड भ्रमणमा छ । तर, ३७ वर्षे फरवार्ड रोनाल्डो पारिवारिक कारण देखाउँदै थाइल्यान्ड गएका छैनन् । रोनाल्डोले यूईएफए युरोपा लिग खेल्ने चाहनाका कारण उचित प्रस्ताव आए युनाइटेड छाड्न सक्ने बताएका छन् । तर, युनाइटेडका प्रशिक्षक टेन ह्यागले रोनाल्डोलाई बिक्री नगर्ने स्पष्ट पारेका छन् ।
“उनी हामीसँग थाइल्यान्डमा छैनन् । त्यो उनको व्यक्तिगत समस्याहरूको कारण हो,” टेन ह्यागले पत्रकार सम्मेलनमा भने, “हामी रोनाल्डोसँग यो सिजनको लागि योजना बनाउँदैछौँ । म उनीसँग काम गर्न उत्सुक छु ।”
पोर्चुगल स्टार फरवार्ड रोनाल्डोले युनाइटेडसँग क्लब छोड्नका लागि आग्रह गरिसकेको बताइएको छ । तर, प्रशिक्षक टेन ह्यागले आफूलाई यसबारे जानकारी नभएको बताए ।
![Global Ime bank](https://baahrakhari.com/uploads/bigyaapan/30885600.gif)
“रोनाल्डोले मलाई यो बताएका छैनन् । मैले समाचारमा पढेको छु । तर, म के भन्छु भने रोनाल्डो बिक्रीको लागि होइनन्,” टेन ह्यागले भने, “रोनाल्डो हाम्रो योजनामा छन् र हामी सँगै सफलता प्राप्त गर्न चाहन्छौँ ।”
रोनाल्डो ओल्ड ट्राफोर्डबाट १२ वर्षपछि फर्किएका हुन् । उनी युभेन्टसबाट गत सिजन युनाइटेडमा फर्किएका थिए । तर, युनाइटेडले छैटौँ स्थानमा रहेर लिगको अन्त्य गरेपछि च्याम्पियन्स लिग खेल्न नपाउने भएको छ । त्यसकारण रोनाल्डोले युनाइटेड छाड्न चाहेका छन् । रोनाल्डोको नाम प्रिमियर लिगकै अर्को क्लब चेल्सी र बुन्डेसलिगाको बायर्न म्युनिखसँग जोडिएको छ ।
युनाइटेडले थाइल्यान्डपछि अष्ट्रेलियाको भ्रमण गर्नेछ ।