सिओल । दक्षिण कोरियाले आफ्ना एक सरकारी अधिकारीलाई उत्तर कोरियाका सैनिकहरूले गोली हानी हत्या गरेको र उनीहरुको शव जलाएको दाबी गरेको छ । 

दक्षिण कोरियाली रक्षा मन्त्रालयले यस घटनाको निन्दा गर्दै 'क्रुर कार्य' को संज्ञा दिएको छ । ती कर्मचारी दुई देशको जलसीमा नजिकै गस्ती गर्ने एउटा डुंगाबाट बेपत्ता भएका थिए । उनीहरुको शव जलेको अवस्थामा उत्तर कोरियाको भेटिएको थियो । 

मन्त्रालयले भनेको छ, "उत्तरका सैनिकले दक्षिण कोरियाका अधिारीहरुलाई गोली हानेको अनि शरीरमा तेल खन्याएर आगो लगाइदिएको छ ।" देशमा कोरोना भाइरस प्रवेश गर्न नदिने उद्देश्यले 'गोली हानेर हत्या' गर्ने नीति लागु गरेको अनुमान गरिएको छ ।

यो आरोपबारे प्योङ्याङले कुनै प्रतिक्रिया दिएको छैन । उत्तर कोरियाले आफ्नो सीमामा समेत कडाइ गरेको छ । 

दक्षिणको रक्षा मन्त्रालयका अनुसार ४७ वर्षीय ती अधिकारी माछा मार्ने मामिला हेर्ने विभागमा कार्यरत थिए । यन्प्युङ टापु नजिकै उत्तर कोरियाको सीमाभन्दा १० किलोमिटर टाढा डुंगामा गस्ती गरिरहेको बेला सोमवार उनी हराएका थिए ।

जुत्ता छोडेर लाइफ ज्याकेट लगाएर उनले डुंगा छोडेको जस्तो देखिएको दक्षिणका अधिकारीहरूले बताएका छन् । उनले देश छोडेर भाग्न खोजेको अनुमान गरिएको छ । उत्तर कोरियाको गस्ती टोलीले उनलाई आफ्नो जलसीमाभित्र थकित अवस्थामा फेला पारेको सोलको भनाइ छ ।

उत्तरमा वरिष्ठ अधिकारीले उनलाई मृत्युदण्डको आदेश सुनाउनुअघि उनीसँग सोधपुछ गरिएको थियो । सैनिकहरूले ग्यास मास्क लगाएर उनको शव जलाइदिएको दक्षिणका अधिकारीहरूले बताएका छन् ।

कोरोना भाइरसविरुद्ध चालिएको उपायअन्तर्गत त्यसो गरिएको हुनसक्ने उनीहरूको अनुमान छ ।

सोलस्थित बीबीसी संवाददाता लोरा बिकरका अनुसार आफ्नो देशमा कोरोना भाइरस महामारी नफैलियोस् भनेर उत्तर कोरियाली अधिकारीहरूले सबै खालका उपाय अवलम्बन गरिरहेको हुनसक्छ ।

कोरोना भाइरस संक्रमण नफैलियोस् भनेर भनेर प्योङ्याङले जनवरीमा नै चीनसँगको सीमा बन्द गरेको थियो । जुलाईमा संकटकालीन अवस्थालाई अधिकतम तहमा पुर्‍याइएको सरकारी सञ्चारमाध्यमले बताएका थिए । - बीबीसी