एजेन्सी । स्पेनिस ला लिगा क्लब बार्सिलोना र जर्मन बुन्डेसलिगा च्याम्पियन बायर्न म्युनिख आज (शुक्रबार) राति भिड्दै छन् । च्याम्पियन्स लिगअन्तर्गत क्वार्टर फाइनलमा बार्सिलोना र बायर्न आज राति भिड्न लागेका हुन् । पोर्चुगलस्थित लिस्बनमा हुने खेल नेपाली समयअनुसार राति १२:४५ बजे सुरु हुनेछ ।
बार्सिलोना १३औं पटक च्याम्पियन्स लिगको क्वार्टर फाइनल खेल खेल्न लागेको हो । २०१४-१५ को सिजनपछि युरोपियन कप जित्न नसकेको बार्सिलोना यस सिजन बायर्नलाई पराजित गर्दै अघि बढ्न चाहन्छ ।
घरेलु लिगको उपाधि दौडमा सफल हुन नसकेको बार्सिलोना यस सिजन च्याम्पियन्स लिग जित्दै सफल सिजन बनाउन चाहन्छ । बार्सिलोनालाई आफ्नो सफल सिजन बनाउन निकैनै दबाब छ । पछिल्लो खेलहरूमा खासै प्रदर्शन गर्न नसकेको बार्सिलोनालई त्यति सजिलो भने छैन ।
हेड टु हेडलाई हेर्ने हो बार्सिलोनाभन्दा बायर्न बलियो देखिएको छ । पछिल्लो १० खेलको नतिजा हेर्दा बार्यनले ६ खेल जितेको छ भने बार्सिलोनाले मात्र दुई खेल जितेको छ । दुई खेल बाराबरीमा रोकिएका छन् ।
बार्सिलोनाका लागि मुख्य खेलाडी कप्तान लियोनल मेस्सी हुन भने यता बायर्नका लागि रोबर्ट लेवान्डोवस्की हुन् । निकै नै लयमा देखिएका लेवान्डोवस्की बार्सिलोनालाई पराजित गर्ने सामर्थ्य राख्छन् । बार्सिलोना भने मेस्सीमा प्रेरित छ ।
“मलाई लाग्छ कि यो एक समान खेल हो । यस खेलबाट हामीले धेरै कुरा भन्नुपर्नेछ,” प्रशिक्षक सेटिनले भने, “यो एक ठूलो प्रतिद्वन्द्वीविरूद्धको महत्त्वपूर्ण खेल हो । हामी दुई उत्कृष्ट टोलीहरू हौं र पहिचानको आधारमा खेल्न चाहन्छौं । मेस्सीले खेल जित्न मद्दत पुर्याउन सक्छ, तर म सधैं टिमको बलमा विश्वास गर्दछु । अन्य खेलाडीले उनलाई सहयोग पुर्याउनु पर्नेछ । किनभने मेस्सी पनि अन्य खेलाडीहरू जस्तै बलविना कमजोर छन् ।”
बार्सिलोनाले शीर्ष १६ मा इटालियन क्लब नेपोलीलाई पराजित गर्दै क्वार्टर फाइनलमा प्रवेश गरेको थियो । त्यस्तै बायर्नले प्रिमियर लिग क्लब चेल्सीलाई पराजित गर्दै शीर्ष आठमा स्थान बनाएको थियो ।
