एजेन्सी । स्पेनिस ला लिगा च्याम्पियन रियल मड्रिडले युभेन्टस्‌का स्ट्राइकर पाउलो डिबालालाई अनुबन्ध गर्न चासो देखाएको छ । 

च्याम्पियन्स लिगबाट बाहिरिएसँगै मड्रिडका अध्यक्ष फ्लोरेन्टिनो पेरेजले डिबालाई अनुबन्ध गर्न चासो देखाएको जनाइएको छ । त्यसका लागि रियलले सुपर अफरको प्रस्ताव गरेको छ । रियलले डिबालाका लागि सय मिलियन युरोबराबरको मूल्य अफरको रिपोर्टमा उल्लेख गरेको छ ।

रियलले उनका लागि टोली क्रुस अथवा इस्कोमध्ये एक खेलाडी दिने प्रस्ताव गरेको छ । तर, यस विषयमा युभेन्टस्‌ले भने कुनै प्रतिक्रिया दिएको छैन । पछिल्लो समय पोर्चुगिज स्टार खेलाडी रोनाल्डोले टुरिन छोड्ने निर्णय गरेको चर्चा छ । 

यस्तो अवस्थामा युभेन्टस्‌ले डिबालाका लागि आएको अफर अस्वीकार गर्न सक्नेछ । तर, रोनाल्डो युभेन्टस्‌मै रहेको खण्डमा आफ्नो वित्तीय संकटलाई ध्यानमा राख्दै क्लबले रियलको प्रस्ताव स्वीकार्न सक्नेछ । किनभने इस्को र क्रुसको मूल्य ६० मिलियन युरो अनुमान गरेको छ ।

डिबालाले यस सिजन सिरी एका ३३ खेल खेल्दा मात्र ११ गोल गरेका छन् भने सबै खाले ४६ खेलमा १७ गोल गरेका छन् ।