एजेन्सी । इटालियन सिरी ए च्याम्पियन युभेन्ट्सलाई फ्रान्सेली लिग वान क्लब लियोनविरुद्ध जित्नै पर्ने दबाब छ । च्याम्पियन्स लिगअन्तर्गत शीर्ष १६ को पहिलो लेग गुमाएको युभेन्ट्सलाई दोस्रो लेग जित्नै पर्ने दबाब रहेको हो ।
युभेन्ट्स र लियोनविरुद्धको दोस्रो लेग युभेन्टसको घरेलु मैदानमा नेपाली समयअनुसार राति १२ः४५ बजे सुरु हुनेछ ।
कोरोना भाइरसका कारण च्याम्पियन्स लिग स्थगित हुनुपूर्व लियोनको घरेलु मैदानमा भएको शीर्ष १६ को पहिलो लेगमा युभेन्ट्स १–० गोले पराजित भएको थियो । त्यसैले च्याम्पियन्स लिगको क्वार्टरफाइनलमा स्थान बनाउन युभेन्टसलाई जित्नै पर्ने दबाब बढेको हो ।
घरेलु मैदानमा युभेन्टसले अर्को चरणमा स्थान बनाउन कम्तिमा पनि २–० गोलले जित्नुपर्नेछ । यदि दोस्रो लेग २–१ गोलले जिते पनि लियोन अवे गोलका आधारमा च्याम्पियन्स लिगको क्वार्टरफाइनलमा प्रवेश गर्नेछ ।
यता लियोनलाई भने घरेलु टोलीलाई रोक्न चुनौती हुनेछ । लियोन घरेलु टोलीलाई कम्तिमा पनि बराबरीमा रोक्न सके अर्को चरणमा प्रवेश गर्नेछ । तर, घरेलु मैदानमा स्टार स्ट्राइकरद्वय क्रिस्यिानो रोनाल्डो र पाउलो डिबालालाई रोक्न त्यति सजिलो भने हुने छैन ।