काठमाडौं । नेपाली कांग्रेसका सभापति शेरबहादुर देउवाले प्रधानमन्त्री केपी शर्मा ओली र सत्तारुढ नेपाल कम्युनिस्ट पार्टी (नेकपा) संसदीय दलका उपनेता सुवासचन्द्र नेम्वाङसँग भएको छलफलका बारेमा पार्टीलाई जानकारी गराएका छन् ।
उनले पार्टी केन्द्रीय कार्यालय सानेपामा जारी केन्द्रीय कार्यसमिति बैठकमा प्रधानमन्त्री ओली र नेकपा संसदीय दलका उपनेता नेम्वाङसँग भएको छलफलका बारेमा जानकारी गराएका हुन ।
बैठकलाई ओली-नेम्वाङसँग भएको छलफलका बारेमा ‘ब्रिफिङ’ गरेको बैठकमा सहभागी केन्द्रीय सदस्य स्रोतले जानकारी दिएको छ । स्रोतका अनुसार उनले असार १७ गते प्रधानमन्त्री ओलीसँग भएको भेटको वातावरण केन्द्रीय सदस्य डा. मिनेन्द्र रिजालले निर्माण गरेको जानकारी बैठकलाई गराएका छन् ।
सभापति देउवाले नेकपा संसदीय दलका उपनेता नेम्वाङसँग आइतबार भएको भेटमा संवैधानिक अंगका रिक्त पद, एमसीसी, नागरिकता विधेयकका बारेमा छलफल भएको पनि जानकारी गराएका छन् ।
बैठकमा केन्द्रीय सदस्य डा. रिजालले नेकपा संसदीय दलका उपनेता नेम्वाङसँग भएको भेटवार्ताका बारेमा थप प्रष्ट्याएका छन् । रिजालले सभापति देउवा र नेम्वाङबीच भएको छलफलका बारेमा बैठकमा ‘ब्रिफिङ’ गरेको केनद्रीय सदस्य नवीन्द्रराज जोशीले जानकारी दिए ।
“बैठकमा नेम्वाङजीसँग आज बिहान भएको भेटघाटको मिनेन्द्रजीबाट ब्रिफिङ भयो,” बैठकमा सहभागी केन्द्रीय सदस्य जोशीले बाह्रखरीसँग भने, “उहाँले नेम्वाङजीसँग संवैधानिक कुरामात्रै भएको भन्नुभयो ।”