काठमाडौं । झापाबाट सुदूरपश्चिम प्रदेशको कैलालीको अत्तरिया पुगेका करिब ५६ जनाले तीन दिनपछि खाना पाएका छन् ।
सुदूरपश्चिमका पहाडी जिल्लामा उनीहरुलाई नेपाली सेनाको सहजीकरणमा एक भाडाको गाडीमा झापाबाट अत्तरिया पुर्याइएको थियो । उनीहरु त्यहाँ तीनपछि भोकै रहेको र अत्तरियामा अलपत्र परेको भन्ने समाचारपछि नेपाली कांग्रेस कञ्चनपुरका महासमिति सदस्य हेमराज ओझाले खाना र पानीको व्यवस्था गरिदिएका हुन् ।
झापामा अलपत्र परेका उनीहरुलाई तीन दिनअघि नेपाली सेनाको सहयोगमा गाडी चढाएर सुदूरपश्चिम प्रदेशमा पठाइएको थियो । त्यसअघि उनीहरु भद्रपुर बहुमुखी क्याम्पसको क्वारेन्टाइनमा चार दिन बसेका थिए । भारतका विभिन्न ठाउँबाट आएका केही मजदुर र झापामा अध्ययनरत विद्यार्थीहरु गरी ५६ जना सुदूरपश्चिम प्रदेशको अत्तरियामा छन् ।
तीन दिनदेखि भोकै रहेका उनीहरुलाई नेता ओझाको सहयोगमा नेपाली कांग्रेस कञ्चनपुरका नेता पुरन खड्का, नेपाल विद्यार्थी संघ कैलालीका पूर्वअध्यक्ष कृष्ण कुवँर र अर्का विद्यार्थी नेता लबबहादुर कुवँर धनगढीबाट अत्तरिया पुगेर खाना खुवाएका थिए ।
उनीहरुसँगको भएको पैसा पनि सकिएको र बाटामा केही खाना खुवाउने होटलहरुसमेत नभेटाएपछि भोकभोकै कैलालीको अत्तरिया पुगेको अलपत्र विद्यार्थी लोकजंग शाहीले बाह्रखरीलाई बताएका थिए । गाडीवालाले उनीहरुलाई त्यहीसम्म मात्र छोड्नसक्ने भन्दै त्यही ओरालिदिएको र झापाबाट अत्तरिया पुर्याएको भाडा मागिरहेको छ । उनीहरुसँग भाडा दिनका लागि पैसासमेत छैन ।
उनीहरुले आफूलाई आ-आफ्नो स्थानीय तह पुर्याइदिन माग गरेका छन् ।
अत्तरियामा अलपत्र मजदुर र विद्यार्थी : तीन दिन भयो खाना पाएका छैनौं, अब कहाँ जाने ?