काठमाडौँ । इजरायलका लागि नेपाली राजदूत अञ्जान शाक्य ‘द एम्बेसडर क्लब अफ इजरायल’ बाट सम्मानित भएकी छन् । इजरायलको ७२औैं स्वतन्त्रता दिवसका अवसरमा शाक्यलाई ‘द एम्बेसडर क्लब अफ इजरायल’ ले ‘एम्बेसडर अफ द इयर २०१९–२०२०’बाट सम्मानित गरिएको हो ।
९० देशका राजदूतमध्येबाट शाक्य सम्मानित भएकी हुन् । उत्कृष्ट छनोट गर्न ९० वटै देशका राजदूतले मत व्यक्त गर्ने चलन छ । अहिलेसम्म युरोप र अमेरिकी मुलुकका राजदूत मात्र सम्मानित हुँदै आएकामा यसपटक नेपाल सम्मानित हुन गौरवको कुरा भएको शाक्यले बताइन् ।
“यो सम्मानलाई नेपाल र नेपालीप्रतिको सम्मानका रूपमा लिएको छु,” राजदूत शाक्यले भनिन्, “यो सम्मानले नेपाल र नेपालीको शिर उँचो बनाएको छ ।” राजदूत शाक्यले सम्मानित गर्न योगदान पु¥याउने ९० मुलुककै राजदूत, इजरायली सरकार, इजरायली जनता र त्यहाँ रहेका नेपालीलाई धन्यवाद दिएकी छन् ।
“यो सम्मानले मलाई थप जिम्मेवार बनाएको छ,” उनले खुसी हुँदै भनिन्, “मेरो योग्यता र क्षमताले भ्यायसम्म नेपाल–इजरायल सम्बन्ध थप प्रगाढ बनाउन विशिष्ट योगदान गरिरहने छु ।”
शाक्य २०७५ फागुन ३ गते राजदूत नियुक्त भएकी थिइन् । यो अवधिमा नेपाल–इजरायल सम्बन्ध थप प्रगाढ बनाउन सक्दो योगदान पुर्याएको बताएकी छन् । अवार्डले थप जिम्मेवार बनाएको उनको भनाइ छ ।
राजदूत नियुक्त भएपछि इजरायल सरकारसँग नेपाललाई प्रविधि, कृषि, शिक्षा, स्वास्थ्यलगायत क्षेत्रमा सहयोग उपलब्ध गराउन भूमिका खेलिरहेको शाक्यको भनाइ छ ।
“केही दिनअघि मात्रै नेपाल इजरायल चेम्बर अफ कमर्स र इजरायल चेम्बर अफ कमर्सबीच दुई देशबीच व्यापार व्यवसाय आदान–प्रदान गर्नेसम्बन्धी सम्झौता भएको छ । सम्झौताअनुसार व्यापार, लगानी, उद्योग, कृषि, पर्यटन, प्रविधि, यातायात, पूर्वाधार विकास, ऊर्जा आदि क्षेत्रमा व्यापार व्यवसाय गर्न बाटो खुलेको छ,” शाक्यले भनिन् ।
