नयाँदिल्ली । लकडाउन अगावैदेखि रोकिएको चलचित्र तथा टेलिशृङ्खलाको छायांकन पुन सुरु गर्न भारतको महाराष्ट्र सरकारले तयारी थालेको छ ।
चलचित्रको छायांकन र रिलिज लामो समय रोकिँदा बलिउड, मराठी चलचित्रका निर्माता तथा कलाकार र दैनिक ज्यालाका चलचित्र क्षेत्रका मजदुरहरू मारमा परिरहेका छन् ।
साथै भारतको अर्थतन्त्रलाई उचालिरहेको चलचित्र उद्योग पनि करौंडोको घाटामा गइरहेको छ । यी सबै पक्षलाई मध्यनजर गर्दै महाराष्ट्र सरकारले सामाजिक दूरीको नियम पालना गर्दै सीमित रूपमा चलचित्रको छायांकन र पोस्ट–प्रोडक्सनको काम अघि बढाउन दिने योजना बनाएको हो ।
मराठी सिनेमा, टीभी र थिएटर इन्डस्ट्रिजका प्रतिनिधिमण्डलका एक प्रतिनिधिसँगको भेटमा मुख्यमन्त्री उद्धव ठाकरेले सरकारले गरिरहेको यस तयारीबारे जानकारी दिएका हुन् । उनले भनेका छन्, “सामाजिक दूरीका साथै अन्य नियमभित्र बसेर छायांकन र पोस्ट–प्रोडक्सनको काम पुनः कसरी सुरु गर्न दिने भन्ने विषयमा सरकारले विचार गर्नेछ ।”
मन्त्री ठाकरेले लकडाउनको मतलब सबै काम ठप्प गर्ने नभएको बताएका छन् । फिल्म इन्डस्ट्री ठप्प हुँदा धेरैको रोजगारी छुटेको भन्दै उनले प्रोडक्सन घरहरूलाई फिल्म सिटीमा भाडामा दिने विचार पनि व्यक्त गरेका छन् ।
छायांकन पुन सुरु गर्न दिए पनि रेडजोन घोषित नभएका स्थानमा विशेष सरसफाइमा ध्यान दिनुपर्ने कुरामा जोड दिइएको छ । यद्यपि चलचित्र हल पुनः सुरु गर्नेबारे भने अझै केही निर्णय भइसकेको छैन ।
कोरोना भाइरसका कारण करिब ७० हिन्दी, ४० मराठी र १० वेब सिरिजको छायांकन रोकिएको छ । जसका कारण यी क्षेत्रमा कार्यरत तीन लाखभन्दा बढीको रोजगारी संकटमा परेको छ । (नवभारत टाइम्स)
