काठमाडौं । सत्तारूढ नेपाल कम्युनिस्ट पार्टी (नेकपा)का अध्यक्ष पुष्पकमल दाहालले चीनबाट खरिद गरेर ल्याइएको चिकित्सा सामग्रीमा भएको अनियमितता बारे गम्भीर चासो व्यक्त गरेका छन् ।

बुधबार अपराह्न प्रधानमन्त्री केपी शर्मा ओलीसँगको भेटमा चिकित्सा सामग्रीमा भएको अनियमितता–भ्रष्टाचारबारे कुरा गरेको दाहालको सचिवालयले जनाएको  छ ।

सरकारले वाणिज्य विभागमा दर्ता नै नभएको कम्पनी ओम्नी समूहसँग खरिद सम्झौता गरेर सामग्री ल्याएको थियो ।

चौतर्फी आवाज उठेपछि स्वास्थ्य सेवा विभागले बुधबार नै ओम्नी समूहसँगको खरिद सम्झौता रद्द गरेर पाँच करोड धरौतीसमेत जफत गरेको छ । 

धरौटी जफत, सम्झौता रद्द मात्रै समस्या समाधान नभएको र भ्रष्टाचार नै भएकाले संलग्नहरूलाई कारबाहीको माग पनि उठिरहेको छ । स्वास्थ्यमन्त्री भानुभक्त ढकालले अन्तर्राष्ट्रिय बजारमा अभाव भएकाले चल्तीको मूल्यभन्दा महँगोमा ल्याउनुपरेकोबाहेक थप टिप्पणी गर्न रुचाएका छैनन् ।

प्रक्रिया नपुर्‍याइ खरिद् सम्झौता गरिएको, बजार मूल्यभन्दा चर्कोमा सरकारले खरिद गरेकोबारे पूर्वप्रधानमन्त्री समेत रहेका दाहालले चासो राखेको सचिवालयको भनाइ छ ।

बुधबारको दुई अध्यक्षको भेटवार्तामा दार्चुलालगायत भारतीय सीमावर्ती इलाकामा अड्किएका नेपालीहरूको विषयमा पनि चिन्ता व्यक्त गरेका थिए । 

दार्चुला पारि धार्चुलामा एक हजारभन्दा बढी नेपाली अलपत्र छन् । भारतीय प्रशासनले व्यवस्थापन गरेको भए पनि उनीहरूले देश छिर्न पाउन याचना गरिरहेका छन् । उनीहरूको व्यवस्थापनबारे सोच्ने दाहालले सरकारलाई निर्देशन दिएको बुझिएको छ ।

पौनेघण्टाको छलफलमा दाहालले लकडाउनबाट मर्कामा परेका गरिब, किसान, मजदुर र विपन्न वर्गलाई थप राहत उपलब्ध गराउन पनि निर्देशन दिएको सचिवालयले जनाएको छ ।

यता प्रधानमन्त्रीको सचिवालयले भने नियमित भेटवार्ता भएको बताएको छ ।

“उहाँहरूबीच अपराह्न ४ बजे भेट भएको हो । नियमित भेटघाट हो,” प्रधानमन्त्रीको सचिवालयले भन्यो ।

फाइल तस्बिर