काठमाडौं । आम जनता पार्टीका अध्यक्ष एवं पूर्वमन्त्री प्रभु साहले प्रधानमन्त्री पुष्पकमल दाहाल ‘प्रचण्ड’को नैतिकतामाथि प्रश्न उठाएका छन् । 

मंगलबार प्रतिनिधिसभा बैठकमा गृह मन्त्रालय, परराष्ट्र मन्त्रालय, भौतिक पूर्वाधार तथा यातायात मन्त्रालय, प्रधानमन्त्री तथा मन्त्रिपरिषद् कार्यालय, राष्ट्रिय योजना आयोग, उपराष्ट्रपतिको कार्यालय र राष्ट्रपतिको कार्यालयको विनियोजित बजेटमाथिको छलफलमा भाग लिँदै उनले सो टिप्पणी गरेका हुन् ।

प्रधानमन्त्री प्रचण्ड आफ्नो बोलीमा अड्न नसकेकाले पदमा बसिरहन नमिल्ने अवस्था आएको उनको भनाइ छ ।प्रधानमन्त्रीले संघमा तीन करोडभन्दा घटीको योजना रहँदैन भन्ने गरे पनि त्यो लागु नभएको उल्लेख गर्दै साहले आफ्नै कुरामा टिक्न नसक्ने प्रधानमन्त्री नैतिक रूपमा पनि पदमा बस्न नमिल्ने बताए । उनले नेपाली जनताले तिरेको कर पहुँचवालाको लागि मात्र वितरण गर्ने काम गर्न नहुने बताए । 

“हामीले हेरिराखेको छौँ, यो बजेट पहुँचवालाको भएको छ । यो नेपाली जनताको राजस्व होइन ? जनताले तिरेको कर होइन ? हो भने देशभरि जानु पर्दैन ?” उनले भने, “प्रधानमन्त्रीबाट यसको जवाफ चाहन्छु । सम्माननीय प्रधानमन्त्रीज्यूले भन्नुभएको थियो–हामी यो संघीयतालाई कार्यान्वयन गर्छौं । अब संघमा तीन करोडभन्दा घटीको योजना रहँदैन । सोध्न चाहन्छु– प्रधानमन्त्रीजी तपाईंको कुरा चलेको छ कि छैन ? चलेको छैन भने तपाईं कुन मोरलले त्यहाँ बस्नु हुन्छ ? यदि चलेको हो भने कसरी तपाईंको कुराको उल्लंघन भयो ? तपाईं आफ्नै कुरामा टिक्नु भएको छैन भने तपाईं मोरल्ली त्यहाँ बस्न मिल्छ जस्तो मलाई लाग्दैन ।”