काठमाडौं । सरकार विरोधी मुद्दा लड्दैआएका विकल झाउ सिफेङलाई चीनको तिआनजिन प्रान्तमा सात वर्ष कैदको सजाय दिइएको छ । 

बीबीसीले बिहीवार दिएको समाचारअनुसार गएको एक वर्षमा चीनमा तीन सयभन्दा बढी कानुन व्यवसायीहरूलाई पक्राउ गरिएको छ भने २० जना अझै थुनामै छन् ।

झाउमाथि उनले अरू वकिलहरूलाई पनि सरकारविरोधी मुद्दामा पैरवी गर्न उक्साएको र प्रदर्शन गराएर न्यायिक प्रक्रिया बिथोल्न खोजेको आरोप लगाइएको छ । उनीमाथि सरकारविरुद्ध जनमत निर्माण गरेको भन्दै देशद्रोहको अभियोग पनि लगाइको छ ।

बीबीसीले एमनेस्टी इन्टरनेसनलका दक्षिणपूर्व निर्देशनालयका निर्देशकलाई उद्धृत गर्दै लेखेको छ - कानुन व्यवसायीमाथि थालिएको कारबाही लहर राजनीतिक उद्देश्यबाट प्रेरित भएकाले उनीहरूको भाग्यको फैसला अदालतमा पुग्नुभन्दा पहिले नै भइसकेको हुन्छ ।