नयाँ दिल्ली । नोभेल कोरोना भाइरसले विश्वलाई त्रसित बनाइरहेका बेला भारत अहिले कोरोना संक्रमितको उपचारका लागि आवश्यक पर्ने भेन्टिलेटर बनाउने दौडमा लागेको छ । यसअघि १२ सय भारतीय रुपैयाँ पर्ने कोरोना परीक्षण किट बनाएर सफलता हात पारेको भारतले अहिले श्वासप्रश्वासमा समस्या भएका कोरोना संक्रमितका लागि अत्यावश्यक हने भेन्टिलेटर बनाउन लागेको हो ।
आठ हजार स्क्वायर फिट क्षेत्रफलमा फैलिएको पुनेमा दर्जनौं इन्जिनियरहरु सस्तो मूल्य पर्ने भेन्टिलेटर बनाउन जुटेका हुन् । यो सफल भए कोरोनासँग लडिरहेका हजारौं संक्रमितको जीवन बचाउन सहयोगी हुने बताइएको छ । भारतमा हालसम्म करिब ४८ हजार भेन्टिलेटर भएको तथ्यांक सार्वजनिक गरिएको छ । यसमा कतिवटा काम गर्छन् भन्ने यकिन छैन । उपलब्ध भएका भेन्टिलेटरहरु भारतका विभिन्न अस्पतालहरुमा बिरामीको उपचारमा प्रयोग गरिएका छन् ।
६ जना कोरोना संक्रमितमध्ये एकजना गम्भीर बिरामी हुने गरेको र उसलाई भेन्टिलेटरको आवश्यकता पर्ने बताइएको छ । जसका कारण विभिन्न मुलुकमा भेन्टिलेटर अभाव भएका समाचारहरु आइरहेका छन् । भेन्टिलेटर अभाव हुन नदिनका लागि सस्तोमा सहजै भेन्टिलेटर उपलब्ध गराउन भारतका विभिन्न शीर्ष इन्जिनियर कलेजका विद्यार्थीहरु यसमा लागेका हुन् ।
भारतमा हाल दुईवटा कम्पनीले भेन्टिलेटर उत्पादन गर्छन् । जसका लागि आवश्यक कच्चा पदार्थहरु बाहिरबाट ल्याइएका छन् । यी कम्पनीले उत्पादन गरिरहेका भेन्टिलेटरलाई हाल एक लाख ५० हजार भारतीय रुपैयाँ पर्दछ । भारतले अहिले चीनबाट १० हजार भेन्टिलेटर मगाएको छ ।
तर, पुनेस्थित नोका रोबोटिक्सले उत्पादन गर्न लागेको भेन्टिलेटरलाई ५० हजार भारतीय रुपैयाँ अर्थात ६६२ अमेरिकी डलर पर्ने बताइएको छ । काम थालेको पाँचौं दिनमा सात इन्जिनियरको समूहले तीनवटा नमुना तयार पारेका छन् । यी भेन्टिलेटरहरुलाई कृतिम फोक्सोमा परीक्षण भइरहेको छ । - बीबीसी