एजेन्सी । प्रिमियर लिग फुटबल क्लब चेल्सीका स्टार खेलाडी पेड्रोले आफ्नो सोच क्लबमै रहने भएको बताएका छन् । सन् २०१५ मा स्पेनिस क्लब बार्सिलोनाबाट चेल्सी आएका पेड्रोले यो सिजन प्रिमियर लिगमा ९ खेल खेल्दै एक गोल र एक असिस्ट गरेका छन् । त्यस्तै च्याम्पियन्स लिगमा तीन खेल खेलेका छन् । 

“मेरो क्लबसँगको सम्झौता मेसम्मको मात्र रहेको सबैलाई थाहा नै छ । तर, अहिलेसम्म मैले क्लबलाई सम्झौता नवीकरण गर्ने या अन्त्य गर्ने विषयमा बोलेको छैन,” पेड्रोले क्लबको वेबसाइटमा भने । 

पेड्रोले बार्सिलोनामा २०४ खेल खेल्दै ५८ गोल गरेका थिए । पेड्रोले स्पेनका लागि ६५ खेल खेल्दै १७ गोल गरे ।  “क्लबका समर्थकहरूले गुड बाई लेखेको म्यासेजहरू देख्छु । कहिले–काहीं आफूलाई पनि क्लब छोडेर जाँदै छु भन्ने लाग्छ । तर म क्लबमै रहन चाहन्छु,” पेड्रोले भने ।