काठमाडौं । अहिले विश्व नै कोरोना भाइरसको चपेटामा परिरहेको छ । जसबाट जोगिन हरेक देशले ‘लकडाउन’ को उपाय अपनाएका छन् ।

यो संक्रमणबाट बच्न नेपालले पनि चैत ११ गतेदेखि १८ गतसम्म ‘लकडाउन’ गरेको छ । 

अहिले सबै जनता घरघरमा क्वारेन्टाइनमा बसिरहेका छन् । यो समयलाई मनोरञ्जन र सिर्जनामत्क बनाउने उद्देश्यका साथ ‘क्वारेन्टाइन नाटक महोत्सव’ सुरु हुने भएको छ ।

थिएटर मल–कीर्तिपुर रङ्मञ्च र थिएटर सेन्टर फर चिल्ड्रेन (टीसीसी नेपाल) को संयुक्त पहलमा ‘क्वारेन्टाइन अभियान नाट्य महोत्सव २०७६’ आयोजना हुने भएको हो ।

शुक्रबार मार्च २७ गते विश्व रङ्गमञ्च दिवसको अवसर पारेर यसको आयोजना गर्न लागिएको हो । 

आयोजक टिमले यस ‘क्वारेन्टाइन अभियान नाट्य उत्सव’ मा आफ्ना नाटकको भिडियोसहित सहभागी हुन सबै रङ्गकर्मीलाई आग्रह गरेका छन् । 

थिएटर मल तथा टीसीसी नेपालका अध्यक्षसमेत रहेका केदार श्रेष्ठ भन्छन्, ‘सेल्फ क्वारेन्टाइनमा बसिरहँदा पनि रङ्गमञ्चबाट टाढा हुन नपरोस् भन्ने हाम्रो सोच हो ।”

“यस्तो विपद, दुःख र भिन्न वातावरणमा नेपाली रङ्गमञ्चले पनि खास केही गर्न सक्ने अवस्था छैन । रङ्गमञ्च आफैंमा त्यस्तो जटिल माध्यम हो जसले दर्शक र जनतासँग नाटकमार्फत् प्रत्यक्षमात्र सञ्चार र संवाद गर्न सक्छ । त्यसकारण रङ्गमञ्चले यो बेला

नाटकघरमा वा कुनै पनि मञ्चमा नाटक मञ्चन गरेर सञ्चार र संवाद गर्न सक्दैन, उनी भन्छन्, “तर पनि यस्तो संकटपूर्ण र जटिल अवस्थामा दर्शक र रङ्गप्रेमीहरूलाई दैनिक जीवनयापन सहज बनाउन र मानसिक रूपमा साथ दिन भर्चुअल माध्यम प्रयोग गर्दै नाटकको भिडियो फेसबुकको भित्तामा प्रस्तुत गर्दैछौं । यसबाट थिएटरको वास्तविक आनन्द, अनुभूति र अनुभव लिन नसकिए पनि क्वारेन्टाइन अवधिलाई रङ्गमञ्चसँग जोडिरहन मद्दत गर्छ भन्ने विश्वास छ ।” 

यो महोत्सव अन्तर्गत हरेक दिन साँझ ५ बजे थिएटर मलको फेसबुक पेज Theatre Mall Kirtipur Rangamanch | www.b.com/theatremall

बाट लाइभ स्ट्रिमिङ हुनेछ ।

कम्तीमा एक सातादेखि अनिश्चितकालसम्म जारी रहने यस महोत्सवमा हरेक दिन फरक फरक एकएक नाटक लाइभ स्ट्रिमिङ गरिने छ ।

साथै नाटक महोत्सव र नाटकबारे सोही पेजमार्फत् अन्तरक्रिया पनि निरन्तर हुने आयोजकले जानकारी दिएका छन् ।