काठमाडौं । कार दुर्घटनामा परेर गायक निशान भट्टराईको मृत्यु भएको छ । 

गएराति काठमाडौंको दरबारमार्गमा रहेको एक रेष्टुरेन्टबाट फर्किने क्रममा आफैंले चलाएको कार तीनकुनेमा दुर्घटनामा परेको थियो । गम्भीर अवस्थामा रहेका उनलाई उपचारका लागि ट्रमा सेन्टर लगिएको थियो ।

ट्रमा सेन्टरमा उपचारकै क्रममा उनको मृत्यु भएको ट्राफिक महाशाखाका प्रमुख एसएसपी भीमप्रसाद ढकालले जानकारी दिए ।

ढकालका अनुसार गायक भट्टराई आफैैंले कार चलाएका थिए । उनले चलाएको कार तीनकुनेमा बिजुलीको पोलमा ठोक्किएको थियो ।

गायक भट्टराईको ‘कामनाले भरिएको...’ पहिलो गीत हो । दीर्घ सिंह बमको रचनामा उनले पहिलो गीत रेडियो नेपालमा गाएका थिए । ‘माया गर माया गर...’ उनको अर्को लोकप्रिय गीत हो । यसमा महिला स्वरमा सुकमित गुरुङले भट्टराईले साथ दिएकी छन् । 

निशान ०४१ मा रेडियो नेपाल प्रवेश गरेका थिए । ०४१ देखि ०४४ को अन्त्यसम्ले उनले रेडियो नेपालमा गायकको रुपमा काम गरेका थिए । 

रेडियो नेपालमा उनलाई बुलु मुकारुङले लगेका थिए । मुकारुङ भन्छन्, “मैले नै निशानलाई रेडियो नेपालमा लगेको हो । उनको प्रतिभाबाट शिवशंकर र नातीकाजी निकै प्रभावित हुनुहुन्थ्यो । उहाँहरुले मन पराएको गायक हो निशान ।”

गायक भक्तराज आचार्यले दरबारमार्गमा रहेको अमर रेष्टुँरा एन्ड बारमा लगेर निशानलाई गाउने काममा लगाइदिएको मुकारुङ बताउँछन् । 

त्यसपछि उनी सोही क्षेत्रमा काम गर्न थालेपछि रेडियो नेपालको जागिर पनि छोडेको उनको भनाइ छ । 

“मैले उसलाई भोजपुर, गोरखा लगायत विभिन्न ठाउँका कार्यक्रममा पनि लगेर गएको छु, राम्रो स्वर भएको मान्छे हो,” उनले सम्झिए । 

गायक निशान भट्टराई ०४६ सालमा पनि ठूलो दुर्घटनामा परेका थिए । उनी गायिका लोचन भट्टराईका भाइ हुन् ।