काठमाडौं । नेपाली कांग्रेसले पार्टीको प्रदेश ५ संसदीय दलका उपनेता वीरेन्द्र कनोडियालाई उखु किसानको भुक्तानी गर्न निर्देशन दिएको छ ।

केन्द्रीय कार्यसमितिको बिहीबारको बैठकले कनोडियालाई उखु किसानको दिन बाँकी रकम तत्काल उपलब्ध गराउन निर्देशन दिएको हो । पार्टी प्रवक्ता विश्वप्रकाश शर्माले कनोडिया सञ्चालक रहेको मिलले समेत उखु किसानको रकम नदिएको समाचारका सन्दर्भमा पार्टीको ध्यानकर्षण भएकाले यथाशीघ्र भुक्तानी गराउन निर्देशन दिइएको बताए । कनोडिया महालक्ष्मी सुगर्सका सञ्चालक हुन् ।

कांग्रेसले राष्ट्रियसभा निर्वाचनमा समाजवादी पार्टीसँग तालमेल गर्ने संकेत पनि दिएको छ । प्रवक्ता शर्माले सभापति शेरबहादुर देउवासँग समाजवादीका नेताहरूको भेटघाट भएको र राष्ट्रियसभामा तालमेल हुन सक्ने बताए । 

केन्द्रीय समिति बैठकमा प्रस्तुत राष्ट्रियसभा निर्वाचनसम्बन्धी प्रस्ताव पारित भएपछि टुंगो लाग्ने शर्माले बताए । उमेदवार चयनका लागि पदाधिकारी बैठकलाई अधिकार दिने प्रस्ताव गरिएको पनि उनले बताए । शर्माले समाजवादीसँग तालमेलको ढोका खुलेको र शुक्रबारसम्म निर्णय हुने सम्भावना रहेको बताए ।

पार्टीभित्र रहेको आन्तरिक किचलो धेरै दिन नरहने उनको दाबी थियो । उनले पार्टीभित्र देखिएका विमतिहरू थाति राखेर भए पनि राष्ट्रियसभा चुनावमा एक भएर जाने वातावरण सिर्जना हुने विश्वास व्यक्त गरे । सरकारले ल्याएको सूचना प्रविधि विधेयक र नेपाल विशेष सेवा ऐनका सन्दर्भमा पनि बैठकमा कुरा उठेको थियो । बिहीबारको बैठकमा असन्तुष्ट रामचन्द्र पौडेल पक्षका नेताहरूको भने सहभागी थिएनन् ।