काठमाडौं । काठमाडौंमा जारी १३ औं दक्षिण एसियाली खेलकुद (साग) मा पहिलो स्वर्ण विजेता खेलाडी मन्डेकाजी श्रेष्ठलाई भारोत्तोलन संघका उपाध्यक्ष राम श्रेष्ठ (बोस) ले ५० हजार रुपैयाँ पुरस्कार दिएका छन् ।

पूर्व खेलाडीसमेत रहेका उपाध्यक्ष श्रेष्ठले प्रोत्साहन स्वरुप स्वर्ण विजेता खेलाडी मण्डेकाजीलाई ५० हजार रुपैयाँ पुरस्कार दिएका हुन् । 

शुक्रबार मण्डेकाजी बसिरहेको होटेलमा नै पुगेर श्रेष्ठले ५० हजारको चेक हस्तान्तरण गरे । 

यसैबीच एथ्लेटिक्स संघका अध्यक्ष राजिब बिक्रम शाहले पनि स्वर्ण विजेता सन्तोषी श्रेष्ठ र गोपिचन्द्र पार्कीलाई जनही एक लाख रुपैयाँ दिने घोषणा गरेका छन् । 

व्यक्तिगत रुपमा खेलाडीलाई सम्मान भइरहे पनि सरकारले अहिलेसम्म पदकधारी खेलाडीलाई रकम दिनेबारे घोषणा गरेको छैनन् ।  

यद्यपि प्रतियोगिता सुरू हुनअघि खेलाडीका लागि विशेष सम्बोधन गर्न आयोजित कार्यक्रममा अर्थमन्त्री युवराज खतिवडाले पदक जित्ने खेलाडीको पुरस्कार राशीमा उल्लेखनीय वृद्धि हुने घोषणा गरेका थिए । 

सरकारले यसअघि भने स्वर्ण विजेता खेलाडीलाई ३ लाख, रजत विजेता खेलाडीलाई दुई लाख तथा कास्य पदक विजेता खेलाडीलाई एक लाख रुपैयाँ पुरस्कार दिँदै आएको छ ।